Қырғызстандық әртістер Маңғыстау облысында жол апатына ұшырады, деп хабарлайды жергілікті Lada.kz. порталы.
Жол апаты тамыздың 16-ынан 17-іне қараған түні орын алған. Маңғыстау облыстық ІІД баспасөз хатшысы Әлия Шермағамбетованың сөзіне қарағанда, "Газель" маркалы микроавтобус жүргізушісінің көзі ілініп кетіп, жолдан шығып кеткен. Соның салдарынан көлік аударылып кеткен.
Салонда "Дея" тобының 13 бишісі болған. Айта кетейік, қырғызстандық әртістер Маңғыстау облысына Түркменстанда өткен "Достық" фестивальінен қайтып келе жатып кірген.
Жарақат алған алты әртіс Шетпе ауылы мен облыс орталығы Ақтаудағы ауруханаға жедел жәрдеммен жеткізілді. Полиция қызметкерлерінің айтуынша, әртістердің алған жарақаты адам өміріне қауіпті емес.
