Шерзат ісі: сотта басты айыпталушының видеосы көрсетілді

видео кадры

Шерзат Болаттың (Полат) өліміне күдікті Абзал Шынасылдың оқиға болған жерде түсірілген видеосы көрсетілді. Бұл видео жасөспірім қаза тапқаннан кейінгі келесі күні – 2024 жылдың 4 қазанында кешкі уақытта түсірілген, - деп хабарлайды Tengrinews.kz тілшісі.

Шерзат Болаттың (Полат) өліміне күдікті Абзал Шынасылдың оқиға болған жерде түсірілген видеосы көрсетілді. Бұл видео жасөспірім қаза тапқаннан кейінгі келесі күні – 2024 жылдың 4 қазанында кешкі уақытта түсірілген, - деп хабарлайды Tengrinews.kz тілшісі.

Тергеушілер күдікті Шынасылды "Қамажай" дүкенінің жанындағы оқиға орнына тергеу әрекеттері үшін алып барған. Онда Шынасыл оқиға қалай болғанын айтып береді. Оның айтуынша, өзі келгенде төбелес болып жатқан.

"Мен ұрдым (Нұрғанат Ғайыпбаевты – еск.), ол көлікке қарай жүгірді. Мылтық алып шықта да аспанға қарай бір рет атты. Сосын екінші оқты салды. Оны аспанға ма әлде жерге қарай ма атты. Сосын үшінші оқты салды. Сосын біздің балалардың біреуі келді де, мылтықтың басын бұрап, алып алды. Олар былай қарай қашты. Екі бала жүгірді, біреуі сол жерде құлады. Қара сақалды бала оның басын ұстап, "скорая" деп айғайлады. Сол жерге келіп, сақалды баланы тептім және ұрдым. Сосын төбелес болып кетті", – дейді Абзал Шынасыл оқиға орнында.

Айта кетейік, 2024 жылдың 4 қазанындағы алғашқы айғақтарда Шынасыл тек Нұрғанатты пышақпен жаралағанын айтқан. Видеода ол Шерзатқа пышақпен соққы жасағаны туралы айтпайды.

"Осы жерге құлады. Құлаған кезде төс қалтадан пышақты алдым да, ұшынан ұстап, жамбасына үш рет тықтым. Сосын "кеттік, кеттік" дегенде машинаға отырып кеттік", – дейді видеода Абзал Шынасыл.