Ресей Президенті Владимир Путиннің Астанаға мемлекеттік сапары аяқталды. Қазақстан Президенті Қасым-Жомарт Тоқаев Путинді елорда әуежайынан өзі шығарып салды, деп хабарлайды Tengrinews.kz.
Бұл туралы жұма күні, 29 мамырда Ақорданың баспасөз қызметі хабарлады.
"Қасым-Жомарт Тоқаев Қазақстанға мемлекеттік сапарын аяқтаған Ресей Президенті Владимир Путинді елорда әуежайынан шығарып салды", - делінген хабарламада.
Ақорданың баспасөз қызметінің фотосы
Еске салайық, Владимир Путин Қазақстанға Қасым-Жомарт Тоқаевтың шақыруымен 27 мамырда келген еді. Сапар аясында екі ел президенттері Қазақстан мен Ресей арасындағы жан-жақты стратегиялық серіктестік пен одақтастық қатынастардың қазіргі жай-күйі мен алдағы бағытын талқылады.
Келіссөз қорытындысы бойынша мемлекет басшылары достық пен тату көршілікке негізделген бірлескен мәлімдеме қабылдады.
Президент Қасым-Жомарт Тоқаев Владимир Путиннің Қазақстанға сапарын табысты өтті деп бағалады.
Ал 28 мамырда Астанада Еуразиялық экономикалық одаққа мүше мемлекеттер басшыларының қатысуымен Еуразиялық экономикалық форум өтті. 29 мамырда Жоғары Еуразиялық экономикалық кеңестің отырысы ұйымдастырылды.
