Ақтөбенің дамуына үлес қосқан бірқатар азаматқа "Қала құрметі" медалі табысталды 11 қараша 2022, 17:43
Бүгін Ақтөбенің дамуына үлес қосқан бірқатар азаматқа "Қала құрметі" медалі табысталды. Оның ішінде "Қала құрметі" медалімен Димаштың алғашқы ұстазы Клара Қажғалиева және қалалық мәслихат депутаты Сания Мұратова, Қоғамдық кеңес мүшесі Жандос Жаңабай марапатталды. Марапатты қала әкімінің орынбасары Гүлназ Сисенова табыстады.
Сания Бұлқайырқызы - мәслихаттың әлеуметтік-мәдени даму және жастар ісі бойынша тұрақты комиссиясының мүшесі. Көптеген әлеуметтік маңызы бар жобалар мен акцияларға белсене қатысады, соның ішінде демеушілік көмек көрсетеді. Мүмкіндігі шектеулі жаңдардың, әсіресе балалардың мәселесіне баса назар аударып, қайырымдылық шараларды ұйымдастырады. Ақтөбе облысы және қаласы бойынша Қазақстанның іскер әйелдер қауымдастығының мүшесі, әйелдер кәсіпкерлігін дамыту бағытында қызмет етіп келеді.
Ал Жандос Кеңесұлы Қоғамдық кеңестің тұрғын үй-коммуналдық, аграрлық және жер мәселелері бойынша тұрақты комиссияның төрағасы. Қаланың қоғамдық өміріне белсенді қатысып, әлеуметтік маңызды жобалардан тыс қалмайды. "Ақтөбе қаласының 150 жылдығы", "Ақтөбе қаласы мәслихатының 25 жылдығы" медальдарымен, "Жыл кәсіпқойы" орденімен, т.б. марапатталған.
Сондай-ақ медаль Димаштың алғашқы ұстазы Клара Кажгалиеваға табысталды. Клара Жанұзаққызы №32 мектептің бастауыш сынып мұғалімі. 33 жыл педагогикалық еңбек өтілі бар ұстаздың шәкірттері елімізде, шет елдерде еңбек етеді. Соның бірі - әйгілі әнші Димаш Құдайберген.
- ПОДЕЛИТЬСЯ