Қазақстанда швейцариялық Stadler пойыздары іске қосылады: жаңа мерзімдері аталды

Швейцариялық Stadler өндірушісінің жаңа жолаушылар вагондары техникалық сынақтар сәтті аяқталған жағдайда осы жазда Қазақстанның теміржол желісіне шығуы мүмкін. Бұл туралы брифингте "ҚТЖ" басқарма төрағасының орынбасары Мұрат Төрегелдин мәлімдеді, деп хабарлайды Tengri Travel.

Брифинг барысында журналистер қазақстандықтардың бұған дейін іске қосылуы бірнеше рет кейінге шегерілген швейцариялық пойыздарды қашан пайдалана алатынын сұрады.

"ҚТЖ" басқарма төрағасы Талғат Алдыбергенов қазіргі уақытта вагондардың қосымша тексеруден өтіп жатқанын айтты.

"Компания үшін жолаушылар қауіпсіздігі мен қозғалыс қауіпсіздігіне басты басымдық беріледі. Желтоқсан айында техникалық сынақтар өткізілді, енді мамыр айында келесі кезең жүріп жатыр. Осыдан кейін пайдалануға беру мерзімдері бойынша нақтырақ түсінік болады", - деді ол.

"ҚТЖ" төрағасының орынбасары Мұрат Төрегелдин бүгінгі таңда 100-ге жуық вагон шығарылғанын және олардың барлығы тестілеу кезеңінде екенін нақтылады.

Оның айтуынша, бұған дейін вагондарға қатысты бірқатар техникалық мәселелер туындаған, сондықтан қауіпсіздік пен жайлылық талаптарына сәйкестігін растау үшін қосымша сынақтар өткізу туралы шешім қабылданған.

"Қазір қабылдау мен тәжірибелік пайдаланудың өте маңызды кезеңі жүріп жатыр. Аса маңызды жүйелердің жұмыс істеу қабілеті тексеріліп жатыр", - деп түсіндірді Төрегелдин.

ҚТЖ егер жаңартылған техникалық шешімдер өз тиімділігін дәлелдесе, компания маусым айында-ақ вагондарды коммерциялық қабылдауға кірісетінін атап өтті.

"Егер сынақтар сәтті өтсе, жазда біз бұл вагондарды желіге шығара аламыз", - деді ҚТЖ төрағасының орынбасары.

Бұл ретте ол коммерциялық қабылдаудың да белгілі бір уақытты алатынын атап өтті: әрбір вагон келісімшарт талаптары мен ЕАЭО стандарттарына сәйкестігіне жеке тексеріледі.

Компания жаңа ескертулер туындаған жағдайда іске қосудың соңғы мерзімдері кейінірек жарияланатынын қосты. Техникалық егжей-тегжейлерді түсіндіру үшін ҚТЖ сынақтар аяқталғаннан кейін Stadler компаниясының өкілдерін жеке баспасөз мәслихатына шақыруды жоспарлап отыр.

Бұған дейін көлік вице-министрі Талғат Ластаев "Тальго" құрамдарын алмастыруы тиіс Stadler-дің алғашқы жолаушылар вагондарын Қазақстанда сәуір айында-ақ іске қосу жоспарланып отырғанын мәлімдеген болатын.