Алматы-Өскемен тас жолында болған жол апатынан бес адам қаза тауып, тағы бес адам ауруханаға жеткізілді, - деп хабарлайды Tengrinews.kz тілшісі. Ірі жол-көлік оқиғасының 27 қазанда кешкі уақытта Алакөл ауданынан өтетін республикалық автожолдың учаскесінде болғаны анықталды.
Алматы облыстық ІІД баспасөз қызметіндегілер бұл деректі растады. Олардың мәліметінше, жол апаты Алматы-Өскемен тас жолының 526-шы шақырымында болған. Geely SC 7 мен Toyota Camry көліктері соғысқан.
Ауруханаға жеткізілгендердің ішінде екі бала бар. Олар түрлі жарақатпен жақын маңдағы ауруханаға жеткізілді.
"Жол-көлік оқиғасына қатысты қажетті сараптамалар тағайындалды. Сотқа дейінгі тергеу жұмыстары облыстық тергеу басқармасындағыларға тапсырылды", - деді Алматы облыстық ІІД баспасөз қызметіндегілер.