Шетелдіктерді жұмысқа тартқан компанияларға 92 миллион теңге айыппұл салынды. Бұл туралы еңбек және халықты әлеуметтік қорғау министрі Біржан Нұрымбетов айтты, - деп хабарлайды Tengrinews.kz тілшісі.
Министр 2019 жылдың тамызынан 393 шетелдіктің Қазақстаннан шығарылғанын айтып өтті.
"Батыс өңірлерде жұмыс берушілердің тарапынан ережебұзушылықтар анықталды - шетелдік және жергілікті мамандарға еңбекақы төлеу мәселесі бойынша. Мұндай проблема осыған дейін де болатын. Сондықтан Еңбек инспекциясы Бас прокуратураның тапсырмасымен 30-дан аса шетелдік маман жұмыс істейтін 95 кәсіпорында тексеріс жүргізді. Онда 393 ережебұзушылық дерегі анықталды - еңбек және көші-қон заңнамасы сақталмаған. (...) Тексеріс нәтижесі бойынша 393 шетелдік Қазақстаннан шығарылды", - деді министр.
Нұрымбетов компания шетелдік жұмыс күшін пайдаланып, жүйелі түрде заңнаманы бұзып келсе, оған қатысты шаралар қатаңдатылуы тиіс екенін айтты.