Ақтөбе облысында қаржы пирамидасы белгілері бар компания анықталды, - деп хабарлайды Tengrinews.kz тілшісі қаржы мониторингі агенттігіне сілтеме жасап.
"Жедел-іздестіру іс-шаралары барысында қаржы пирамидасын ұйымдастырушылар өздерін Crowd 1 халықаралық желілік ұйымы ретінде таныстырып, халыққа виртуалды жер учаскелерін сатып алуға қатысты құны мен түрлері бойынша ерекшеленетін "пакеттерге" ақша қаражатын инвестициялауды ұсынғаны анықталды", - деп хабарлады агенттікте.
Тергеу барысында "пакеттердің" бірнеше түрлері анықталды - ақ, қара, алтын және титан, олардың құны 99 еуродан 2 499 еуроға дейін жетеді.
"Осылайша, ұйымдастырушылар активтерді компанияға тартуды қамтамасыз етіп, кепілдендірілген пайда алуға уәде беріп отырған. Қазіргі бұл дерекке қатысты ҚК-нің 217-бабы 1-бөлігі бойынша сотқа дейінгі тергеп-тексеру жұмыстары басталды", - деп хабарлады агенттікте.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
