Қаржы министрлігінің Мемлекеттік кірістер комитеті 2023 жылдың 1 қаңтарынан бастап қолма-қол ақшаны декларацияда көрсету талабын түсіндірді, - деп хабарлайды Tengrinews.kz тілшісі.
Жалпыға бірдей декларациялаудың екінші кезеңінде 2023 жылғы 1 қаңтардан бастап активтер мен міндеттемелер туралы декларацияны (250.00-нысан) квазимемлекеттік сектордың, мемлекеттік мекемелердің қызметкерлері және олардың жұбайлары тапсыруға тиіс.
"Активтер мен міндеттемелер туралы декларацияда айлық есептік көрсеткіш (АЕК) мөлшерінің 10 000 еселенген мөлшерінен аспайтын қолма-қол ақша көрсетілуі тиіс. Бұл ретте, заңнамада 10 000 АЕК-тен астам қолма-қол ақшаны сақтауға тыйым салынбаған. Осыған байланысты жеке тұлғалар ақшаны қолма-қол немесе қолма-қол ақшасыз нысанда сақтау мәселелерін, сондай-ақ олардың сомасын өздері шешуге құқылы", - делінген хабарламада.
Кеше Президенттің қол қоюына жіберілген бюджет туралы заң жобасына сәйкес, 2023 жылы АЕК 3450 теңге болады. Сондықтан 34,5 миллион теңгеге дейін қолма-қол ақша сақтауға мүмкіндік туады.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
