Елена Рыбакина АҚШ-тағы ірі турнирде топ жарды 20 наурыз 2023, 08:22
Қазақстандық теннисші Елена Рыбакина Индиан-Уэллстегі турнирде жеңімпаз атанды. Финалда беларусь спортшысы Арина Соболенкодан айласын асырып, Australian Open-2023 жарысында кеткен есесін қайтарды, - деп хабарлайды Tengrinews.kz тілшісі.
Елена қарсыласын 2 сет қорытындысы бойынша жеңіп шықты. Бірінші сет 1 сағат 20 минутқа созылып, 7:6 (13:11) есебімен жеңіске жетті. Екінші сетті 6:4 есебімен аяқтады. Осылайша, рейтингтік 1000 ұпайға ие болды.
Қазіргі таңда Елена Рыбакина WTA рейтингінде 10-орында тұр. Осы жеңісінен кейін 7-орынға көтеріледі. Ал Арина Соболенко әлемнің екінші ракеткасы. Қазақстандық теннисші қарсыласын алғаш рет ұтты. Бұған дейін төрт рет есе жіберген еді.
Елена Рыбакина – Индиан-Уэллс турнирінде әлемнің бірінші және екінші ракеткасын жеңген алғашқы теннисші. Ол жартылай финалда поляк Ига Швентекті жарыстан шығарған еді.
Қазақстандық теннисші жарыстағы жарқын жеңісі үшін 1 262 220 АҚШ доллары көлемінде сыйақы алады.
Сілтемесіз жаңалық оқисыз ба? Онда Telegram желісінде парақшамызға тіркеліңіз!