Саяхатшыларға Дубайдағы ең танымал қонақүйлердің бірінде тегін тұруға мүмкіндік туады

Emirates әуе компаниясының жолаушылары Дубайдағы 5 жұлдызды қонақүйде екі түн тегін түней алады. Бірақ ескеретін жайт бар: бұл акция барлығына бірдей автоматты түрде қолжетімді емес, ол тек бірқатар шартты орындағанда және алдын ала өтінім бергенде жарамды, деп хабарлайды Tengri Travel тілшісі Time Out Dubai-ке сілтеме жасап.

Кім ала алады?

Қонақүйдегі тегін демалыс ұзақтығы сіз ұшатын санат түріне тікелей байланысты:

• бизнес және бірінші санат: жолаушыларға екі түн тегін тұру мүмкіндігі беріледі;
• премиум-эконом және эконом санат: саяхатшыларға бір түн тұру тегін беріледі.

Саяхатшылар әлемдегі ең биік қонақүйлердің бірі - JW Marriott Marquis Hotel Dubai-ға орналастырылады. Бұл мейрамханалары, спа-орталықтары бар және қаланың таңғажайып көрінісін тамашалауға болатын биік қонақүй ғимараты.

Мүмкіндікті қалай пайдалануға болады?

Билет сатып алған кезде қонақүйден тегін нөмірді автоматты түрде брондау мүмкін емес. Әуекомпания нұсқаулығына сәйкес, келесі шарттарды орындаған жағдайда ғана жүйе сіздің өтініміңізді қабылдайды:

• Emirates-тің ресми сайты немесемобильді қосымшасы арқылы Дубайға (немесе транзитпен) "бару-қайту" рейсін брондаңыз.
• поштаға өтінім жіберіңіз. Билеттерді рәсімдегеннен кейін EmiratesOffer@emirates.com электронды мекенжайына хат жазыңыз. Хат мәтінінде міндетті түрде брондау нөмірін (PNR), жолаушылардың аты-жөнін (нөмір тек PNR-де көрсетілген адамдарға рәсімделеді), Дубайға келетін нақты күнді, сондай-ақ қонақүйден растау алу үшін байланыс телефонын және өзекті e-mail-ді көрсету қажет.

Қандай шарттар мен ерекшеліктер бар?

Бағдарламаның қатаң ережелері бар:

• ұшу билетін (міндетті түрде бару-қайту) 12 шілде, жексенбіге дейін рәсімдеу керек.
• ұсыныс 25 маусым мен 30 қыркүйек аралығында орындалатын рейстерге жарамды.
• транзиттік жолаушылар үшін: егер Дубай сіз үшін тек аралық пункт болса, аялдау уақыты кемінде 24 сағат болуы тиіс.

Маңызды жайт: билет сатып алу және өтінім жіберу Дубайға барғанға дейін 96 сағаттан кешіктірілмей орындалуы тиіс. Егер рейске дейін төрт тәуліктен (96 сағаттан) аз уақыт қалса, жүйе бұл қызметті өткізбейді.