АҚШ пен Иран арасындағы қарым-қатынастың жақсаруы мүмкін деген белгілер фонында әлемдік мұнай бағасы кейінгі бірнеше айдағы ең төменгі деңгейге дейін арзандады, - деп хабарлайды Tengrinews.kz тілшісі.
АҚШ пен Иран арасындағы қарым-қатынастың жақсаруы мүмкін деген белгілер фонында әлемдік мұнай бағасы кейінгі бірнеше айдағы ең төменгі деңгейге дейін арзандады, - деп хабарлайды Tengrinews.kz тілшісі.
Астана уақыты бойынша сағат 11:36-да Лондондағы ICE биржасында Brent маркалы мұнайдың қыркүйек айындағы фьючерстерінің бағасы 1,1 пайызға төмендеп, бір баррель үшін 70,78 долларды құрады.
Ал WTI маркалы мұнайдың тамыз айындағы фьючерстері 1,21 пайызға арзандап, барреліне 67,75 долларға дейін түсті.
Айта кетейік, өткен аптада мұнай бағасы АҚШ пен Иран арасындағы қақтығыс басталғалы бергі ең төменгі деңгейге жеткен болатын.
Мұнай неге арзандап жатыр?
Мұнай бағасының төмендеуіне екі негізгі фактор әсер етіп жатыр.
Біріншісі - АҚШ пен Иран арасындағы қарым-қатынастың жақсаруы мүмкін екендігін білдіретін сигналдар. Бұған дейін АҚШ президенті Дональд Трамп Қатардағы келіссөздердің сәтті өткенін мәлімдеген. Сондай-ақ бұқаралық ақпарат құралдары Вашингтон мен Тегеран арасында Ормуз бұғазы арқылы кеме қатынасы мен атысты тоқтату мәселелері бойынша техникалық консультациялар жүргізілгенін хабарлады.
Екінші фактор - ОПЕК+ ұйымының шешіміне қатысты күтілімдер. Дереккөздердің мәліметінше, альянсқа мүше елдер 5 шілдеде өтетін кезекті отырыста тамыз айында мұнай өндіру көлемін тәулігіне шамамен 188 мың баррельге арттыру туралы шешім қабылдауы мүмкін.
Бағаның төмендеуін АҚШ-тағы статистикалық деректер ішінара тежеп отыр. АҚШ-тың Энергетикалық ақпарат басқармасының (EIA) мәліметінше, елдегі коммерциялық мұнай қоры бір апта ішінде 3,8 миллион баррельге азайып, 2018 жылдың қыркүйегінен бергі ең төменгі деңгейге жеткен.
Мұнай бағасы Қазақстан экономикасына қалай әсер етеді?
Бұған дейін мұнай-газ саласының сарапшысы Асқар Исмаилов мұнай бағасы бюджет кірісіне, Ұлттық қордың жай-күйі және теңге бағамына әсер ететінін айтқан. Баға өскенде оң әсер байқалады, ал төмендегенде - керісінше.
Мұнай нарығындағы тұрақсыздық экономика үшін тәуекелдерді күшейтеді. Бағаның күрт құбылуы инфляцияға, инвестициялық белсенділікке және қаржы нарықтарына әсер етеді. Мұнай кірістеріне тәуелділік елді сыртқы соққыларға осал етеді.
Бұл ретте 2026–2028 жылдарға арналған бюджетте базалық параметрлер бекітілген: мұнай бағасы барреліне 60 доллар деңгейінде және доллар бағамы 540 теңге. Экспорттық кірістер, әлеуметтік төлемдер және мемлекеттік шығыстар дәл осы бағдарлар негізінде есептеледі.
Сілтемесіз жаңалық оқисыз ба? Онда Telegram желісінде парақшамызға тіркеліңіз!