Апатқа ұшыраған "Боинг" ұшағы тиесілі Flydubai әуе компаниясының бас директоры Гайс Әл-Гайс лайнеріндегі қаза тапқандардың туыстарына көңіл айтты. Ол компания қызметкерлерінің болған жағдайдан қатты шошынып қалғанын жеткізді, - деп хабарлайды LifeNews.
"Бортта болған жолаушылар мен экипаж мүшелерінің жақындарына көмек көрстеу - біздің басты міндетіміз. Flydubai компаниясындағы әрбір қызметкер қаза тапқандардың туыстарымен бірге. Әзірше біз оқиғаның мән-жайын толық білмесек те, апаттың себебін анықтау үшін билікпен тығыз жұмыс істеп жатырмыз. Бортта болғандардың жақындарына көмек көрсету үшін қолдан келгенін жасаймыз", - деді ол.
Еске салайық, әуе апаты бүгін, Астана уақыты бойынша 19 наурызда сағат 6.50-де Ростов-на-Дону әуежайында болды. Дубайдан келе жатқан "Боинг-737-800" ұшып-қону жолағынан 100 метр жерге құлап, бөлініп кеткен де, кейін өртенген. Ұшақ бортында төрт баланың болғаны анықталды. Лайнердегі 55 жолаушы мен 7 экипаж мүшесі түгелдей қаза тапты.
