Түркияда жер сілкінісі болды: зардап шеккендер бар
Фото: © REUTERS
Түркияның шығысында магнитудасы 5,7 болатын жер сілкінісі тіркелді, деп хабарлайды Tengrinews.kz тілшісі.
Еуропалық Жерорта теңізі сейсмологиялық орталығының (EMSC) мәліметіне сәйкес, жер сілкінісі 14.24 UTC (20.24 - Нұр-Сұлтан уақыты бойынша) тіркелген. Зілзала ошағы Бингель қаласынан 55 шақырым жерде орналасқан.
РИА Новости хабарына қарағанда, жер сілкінісі салдарынан бірнеше ауылдағы үй қираған, 1 адам қаза тапқан. Түркияның төтенше жағдаймен күрес басқармасы оқиға орнына 550 шатыр жіберген.
"Жер сілкінісі салдарынан салдарынан 18 адам зардап шекті. Олардың арасында жағдайы ауыр адамдар жоқ", - деді республиканың вице-президенті Фуат Октай.
Оның айтуынша, зілзаладан кейін магнитудасы төмен 46 жер сілкінісі болған. Табиғи апаттан келген шығынның мөлшері есептеліп жатыр.