Еуропадағы тағы бір ел туристерге алымды арттырады

France24 мәліметінше, кейінгі жиырма жылда Вена нағыз туристік серпілісті бастан өткерді. Егер 2005 жылы қала 8,8 миллион турист қабылдаса, 2025 жылы бұл көрсеткіш 20,1 миллионға жеткен. Қауіпсіздіктің жоғары деңгейі, дамыған инфрақұрылым, мәдени көрікті жерлер мен өмір сүру сапасының үйлесімі арқасында Аустрия астанасы Еуропадағы ең танымал қалалардың бірі болып отыр.

Неге Вена билігі туристік алымды көтеру шешімін қабылдады?

Муниципалитет пікірінше, туризм саласы күн сайын миллиондаған қонақ пайдаланатын қалалық инфрақұрылымды қаржыландыруға белсенді қатысуы тиіс.

"Туризм саласы бірінші класты қалалық инфрақұрылымды бұрынғыдан да көп пайдаланып отыр, сондай-ақ оны күтіп ұстау мен дамытудың игілігін көріп жатыр, сондықтан бұл саланың өз үлесін қосқаны әбден орынды", - деді Вена туристік кеңсесінің өкілі Изабелла Раутер.

Сондай-ақ ол туристік салықты көтеру - бұл қаланы туристер үшін ғана емес, Вена тұрғындары үшін де жайлы ете түсетін "бағыттың болашағына салынған инвестиция" екенін атап өтті.

Есептеу бойынша, қосымша түсім қалалық ортаның жоғары деңгейін сақтауға көмектеседі және Венаға Солтүстік Еуропа мен Швейцарияның ірі қалаларымен бәсекеге қабілетті болып қалуға мүмкіндік береді.

@norbertlepsik Вена, Аустрия ❤️🏛️🇦🇹 Вена - Еуропадағы ең әдемі астаналардың бірі. Императорлық тарих, айбынды сәулет және заманауи қала тынысы қатар өрілген бұл шаһар - Орталық Еуропаға жолы түскен жан міндетті түрде баруы тиіс мекен әрі Аустриядағы ең таңдаулы орындардың бірі. 😍🙌🏽 Венаның тарихи орталығында серуендеу тірі мұражайға қадам басқандай әсер береді. Әулие Стефан соборы, Шёнбрунн сарайы, Хофбург сарайы және Вена мемлекеттік операсы сияқты нысандар қаланың қайталанбас бейнесін қалыптастырып, оны императорлық мұрасы мен мәдени маңызы арқылы әлемге танытты. 🏛️🇦🇹 Көрікті көшелер, жайлы дәмханалар мен Рингштрассе сияқты зәулім бульварлар саяхатшылар іздейтін классикалық Вена эстетикасын құрайды. 🚋😍 Бұл видеода Вена метросының (U-Bahn) U1 желісіндегі шынайы хабарландырулар арқылы қаланың нағыз тынысы мен Stephansplatz, Karlsplatz сияқты маңызды орындарды байланыстыратын күнделікті тіршілігі көрсетілген. Вена метросы - жай ғана көлік емес, қаланың ырғағы, ол тарихи ескерткіштер мен жанды аудандарды жалғап, Венаны өмір сүруге ең қолайлы қалалардың біріне айналдырады. Императорлық сарайлардан бастап әсем көшелерге дейін, Вена саяхатшылар мен фотографтарға шабыт сыйлауын тоқтатпайды. Wien, Österreich ❤️🙌🏽 Вена метросының дыбыстық өңдеуі 🚉Ⓜ️ #vienna #viennatravel #wien #viennaaustria #viennaspots ♬ Vienna metro sound edit by norbertlepsik - Norbert Lepsik

Қонақүй иелері Венадағы демалыс тым қымбаттап кетеді деп қауіптенеді

Қонақүй бизнесінің өкілдері бұл жаңалықты аса қуанышпен қабылдаған жоқ. Аустрия қонақ үйлер қауымдастығының пайымдауынша, бұл өсімнен кейін туристік алым Амстердамнан кейін Еуропадағы ең жоғары көрсеткіштердің біріне айналады.

Ұйым өкілі Мартин Штаниц қонақүйлер қазірдің өзінде жоғары салықтық жүктемеге, электр қуаты, азық-түлік және қызметкерлер еңбекақысының өсуіне байланысты шығынға тап болып отырғанын атап өтті.

"Ондаған жылдар бойы қала өз мүмкіндігінен тыс өмір сүріп келді, ал енді бюджет тапшылығын туризм есебінен өтеуге тырысып жатыр", - деді ол.

Оның айтуынша, мұндай саясат Венаның саяхатшылар үшін тартымдылығына кері әсерін тигізуі мүмкін.

"Алтын жұмыртқа салатын тауықты сою - жақсы идея емес", - деп қосты Штаниц.

Туризм саласының басқа да өкілдері осыған ұқсас пікір білдіріп жатыр. Аустрия туристік агенттіктер қауымдастығының басшысы Грегор Каданка салық пен алымның үздіксіз өсуі Аустрияны көршілес бағыттармен салыстырғанда бәсекеге қабілетсіз етеді деп санайды. Мысал ретінде ол лоукостерлер бірінің Венаның орнына жақын маңдағы Братиславаға рейстерді белсенді дамыту туралы шешімін алға тартты.

Оның пікірінше, Орталық Еуропаның басқа астаналарымен салыстырғанда Аустрия астанасы барған сайын қымбат бағытқа айналып, біртіндеп "тартымдылығын жоғалтып" барады.

@shewandersabroad Венада әдемі жерлердің көптігі сонша, олардың арасынан ең таңдаулысын бөліп көрсету қиын. Егер бұл қалаға алғаш рет келе жатсаңыз, мына тізім сізге таптырмас бағыт-бағдар болады 🥰🇦🇹 Венадағы менің ең сүйікті жерлерім 👇 🏰 Шёнбрунн сарайы ☕ Cafe Central 🎭 Вена мемлекеттік операсы ⛪ Карлскирхе 🏛️ Palais Daun Kinsky 📚 Австрия ұлттық кітапханасы 📸 Михаэлерплац 🦖 Вена жаратылыстану тарихы мұражайы ⛪ Әулие Стефан соборы 🏛️ Юстиция сарайы 🖼️ Көркемөнер тарихы мұражайы 🌸 Фольксгартен ⛪ Петерскирхе 🏰 Бельведер сарайы 🍰 Sacher кафесі Венаға келесі сапарыңыз үшін сақтап қойыңыз! 📌 #vienna #viennaaustria #viennatravel ♬ original sound - r

Вена әзірге жаппай туризм мәселесіне тап болған жоқ

Саяхатшылар саны рекорд көрсеткішке жеткеніне қарамастан, Вена әзірге басқа еуропалық қалаларда байқалып отырған шамадан тыс туризм мәселесін бастан кешіп жатқан жоқ.

Бұл көбіне Австрия астанасына мұражай мен классикалық музыка сүйер қауым ғана емес, халықаралық конференцияларға, дипломатиялық іс-шараларға қатысушылар мен іскерлік сапармен келетіндердің де көптеп тартылуымен байланысты. Дегенмен сарапшылар пікірінше, туристік алымның одан әрі өсуі Вена мен аймақтағы басқа танымал қалалар арасындағы демалыс құнының айырмашылығын арттыра түспек. Мысалы, Прагада туристік салық бір түнге шамамен екі еуро.

Мұндай шараларды Еуропаның басқа елдері де қарастырып жатыр

Вена - туристік алымдарды жинау ережесін қайта қарап жатқан жалғыз еуропалық қала емес.

Мәселен, Венеция билігі бір күндік туристер үшін кіру жарнасын көтеруді жоспарлап отыр. Жаңадан сайланған мэр Симоне Вентурини жекелеген күндері ең жоғары төлемді 50 еуроға дейін жеткізуге ниетті. Бұған жүйенің алғашқы жұмыс жылдарының нәтижесі себеп болды: қала билігінің пайымдауынша, алдын ала брондау кезіндегі 5 еуролық және соңғы сәтте төленетін 10 еуролық қазіргі тарифтер туристер ағынын тежеуге әсер етпеген.

Сонымен қатар қонақүй бизнесінің өкілдері бұл бастаманы қолдап, жоғары әрі икемді мөлшерлеме жүктеме артатын күндері келушілер санын тиімдірек реттеуге көмектеседі деп санайды. Түскен қаражатты, соның ішінде, Венеция тұрғындарының қажеттіліктеріне жұмсау жоспарланған.

Тағы бір мысал - Барселона. 2026 жылдың 1 сәуірінен бастап қала туристік салықты екі есе арттырды. Ең жоғары мөлшерлеме бір түнге 6,25-тен 12,5 еуроға дейін өсті, ал қонақүй қонақтары үшін міндетті алымның жалпы сомасы орналасу санатына байланысты шамамен 10-нан 15 еуроға дейінгі аралықта.

Бұл шешім қолжетімді тұрғын үй құрылысын қаржыландыру және туристер ағынын ішінара шектеу қажеттілігімен түсіндіріледі. Жаңа ережеге сәйкес, қосымша табыстың төрттен бірі тұрғын үй дағдарысын шешуге, ал қалған қаражат Туризмді дамыту қорына бағытталады.

Бұл туристер үшін нені білдіреді?

Туристік алымды арттыру үрдісі бірте-бірте Еуропада кең тарап барады. Көптеген қала мұндай төлемдерді инфрақұрылымға түсетін жүктеме орнын толтыру, туристік бағыттардың дамуын қаржыландыру және жаппай туризм салдарымен күресу тәсілі ретінде қарастырады.

Дегенмен туризм саласы өкілдері міндетті төлемдердің шамадан тыс өсуі кейбір танымал еуропалық бағыттарды, әсіресе анағұрлым қолжетімді көршілес қалалар тұрғанда саяхатшылар үшін тартымсыз етуі мүмкін екенін ескертеді.

Тағы оқыңыз: Түркиядағы демалыс қымбаттай түсуі мүмкін