+7 (777) 001 44 99
Қазақша
Русский
English
Қазақша
Русский
English
Мемлекеттік әлеуметтік сақтандыру қоры (МӘСҚ) жүктілік пен босану бойынша әлеуметтік төлемдерді заңсыз алу деректері қалай анықталғаны туралы айтып берді, - деп хабарлайды Tengrinews.kz тілшісі.
Схема қалай жұмыс істеген: жалған жұмыс берушілер мен жоғары табыс
Тексеру барысында МӘСҚ жалған еңбек қатынастарын анықтаған. Кейбір кәсіпкерлер әйелдерді расымен жұмысқа алғанын дәлелдей алмаған.
Мұндай жағдайлар жүкті әйелдердің декреттік демалысқа шығар алдында әдейі табысын арттыруымен байланысты. Ол үшін әйелдер бірнеше жұмыс берушіден әлеуметтік аударымдар жасап отырған, шын мәнінде еш жерде жұмыс істемеген.
Деректер қалай әшкереленді?
Заң бойынша қор әлеуметтік төлемдерді тағайындау үшін ұсынылған құжаттардың шынайылығын тексеруге құқылы. Ол үшін мемлекеттік органдардан, ұйымдардан, төлеушілер мен өтініш берушілердің өздерінен ақпарат сұратады. Тексерулер әлеуметтік аударымдар жүргізілген табыстың артық немесе кем көрсетілгенін анықтауға көмектеседі.
Осы тексерулер кезінде кейбір жұмыс берушілердің нақты жұмыс қатынасы болмаса да әлеуметтік төлемдер аударғаны белгілі болған. Мұндай жағдайлар құқық қорғау органдарына жіберіледі.
Жалған анықтамалар арқылы қанша алуға болатын еді?
Жүктілік пен босану бойынша әлеуметтік төлем алуға құқық жүктілік пен босану бойынша уақытша еңбекке жарамсыздық парағында көрсетілген күннен бастап туындайды.
Әлеуметтік төлемнің мөлшері әйелдің құқық туындаған айға дейінгі соңғы 12 ай ішіндегі орташа айлық табысына және еңбекке жарамсыздық күндерінің коэффициентіне (ККД) байланысты. ККД – еңбекке жарамсыздық парағында көрсетілген күн санын 30 күнге бөлу арқылы есептеледі.
2024 жылы жүктілік пен босану бойынша әлеуметтік төлемнің ең жоғары мөлшері 5 миллион теңгеден асты.
175 қылмыстық іс және 52 миллион теңге қайтарылды
Қор құқық қорғау органдарына тиісті материалдарды жіберді. Бүгінде 175 қылмыстық іс қозғалды, ал 47 алушы 52 миллион теңгеден астам соманы өз еркімен қайтарды.
Зиянды өтемегендерге сотқа жүгіну қаупі бар. Қаражатты қайтару "Азаматтарға арналған үкімет" мемлекеттік корпорациясы арқылы жүзеге асырылады, кейін ол МӘСҚ-қа қайтарылады.
Салдары мен беделге нұқсан келтіру қаупі
Әрбір жағдай бойынша сотқа дейінгі тергеу жүргізіледі. Тергеу нәтижесінде сот тек төлемдерді қайтаруды ғана емес, алаяқтық үшін қылмыстық жауапкершілікке тартуды да міндеттей алады.
Жалған жұмыс берушілер де қасақана рәсімделу дәлелденсе, жәрдемдескені үшін жауапқа тартылуы мүмкін.
Енді әйелдерді қалай тексереді?
Енді бұл мәселені шешу үшін басқа деректер базаларымен салыстыру жүргізіледі. Әсіресе қысқа мерзімде бірнеше жұмыс берушіде "жоғары табысты" маманға айналған әйелдердің төлемдері ерекше назарға алынады.
