+7 (777) 001 44 99
25 тамыздан бастап Қазақстанда көлік құралдарын басқару құқығын тоқтату ережелері өзгереді. Жаңа нормалар 65 жастағы және одан асқан жүргізушілерге, мүгедектігі бар жүргізушілерге, сондай-ақ мас күйде көлік жүргізу туралы қылмыстық істері айыптау үкімінсіз тоқтатылған адамдарға қатысты болады, деп хабарлайды Tengri Auto.
Түзетулер "Жол жүрісі туралы" заңға енгізілді. Жүргізушінің қандай жағдайларда куәлігінен айырылуы мүмкін екенін және оны кейін қалай қалпына келтіруге болатынын анықтап көреміз.
65 жастан асқан жүргізушілер мен мүгедектігі бар адамдар медициналық тексеруден өтеді
65 жастағы және одан асқан жүргізушілер, сондай-ақ мүгедектігі бар жүргізушілер жүйелі түрде қайта медициналық тексеруден өтуі тиіс.
25 тамыздан бастап медициналық тексеру ғана емес, оның нәтижесі жол жүрісі саласындағы цифрлық жүйеде болуы да маңызды.
Егер жүйеде жүргізушінің денсаулық жағдайы бойынша көлік жүргізуге рұқсат етілгені немесе медициналық қарсы көрсетілімдері бар-жоғы туралы мәліметтер болмаса, бұл басқару құқығын тоқтатуға негіз болады.
Жүйеге рөлге отыруға рұқсаты бар жүргізушілер туралы да, көлік жүргізуге қарсы көрсетілімдері анықталғандар туралы да мәліметтер енгізіледі.
Мас күйде көлік жүргізу туралы істің жабылуы енді куәлікті сақтап қалуға көмектеспейді
Екінші жаңа негіз көлік құралын мас күйде басқарғаны үшін қылмыстық жауаптылықтан босатылған жүргізушілерге қатысты.
Мұндай жағдайларда қылмыстық іс айыптау үкімінсіз тоқтатылуы мүмкін. Мысалы:
- рақымшылық бойынша;
- қылмыстық жауаптылыққа тарту мерзімінің өтіп кетуіне байланысты;
- егер адам тыйым салынған әрекетті есі дұрыс емес күйде жасаса және оған мәжбүрлеп емдеу қажет болмаса;
- егер уәкілетті орган иммунитеті бар тұлғаны қылмыстық қудалауға келісім бермесе;
- егер адам Қылмыстық кодексте көзделген негіздер бойынша қылмыстық жауаптылықтан босатылуы тиіс болса.
Қылмыстық кодекс мұндай негіздерге, атап айтқанда, шын өкінуді, процестік келісім шарттарын орындауды, заңда көзделген жағдайларда татуласуды және кәмелетке толмағандарды жауаптылықтан босатуды жатқызады.
25 тамыздан бастап аталған негіздердің бірі бойынша қылмыстық істің тоқтатылуы басқару құқығын сақтап қалуға мүмкіндік бермейді.
Қылмыстық істі тоқтату туралы заңды күшіне енген қаулы негіз болады. Осыдан кейін уәкілетті орган басқару құқығын тоқтатып, ақпаратты цифрлық жүйеге енгізеді.
Сот шешімі қажет пе?
Жаңа негіздер бойынша басқару құқығын тоқтату туралы жеке сот шешімі талап етілмейді.
Шешімді уәкілетті мемлекеттік орган белгіленген тәртіппен қабылдайды. Рәсім нақты қалай өтетінін уәкілетті органның өзі айқындауы тиіс.
Басқару құқығын қалай қайтаруға болады?
Егер басқару құқығы медициналық мәліметтердің жоқтығынан тоқтатылса, оны цифрлық жүйеде көлік жүргізуге қарсы көрсетілімдердің жоқтығы туралы қорытынды пайда болғаннан кейін қалпына келтіруге болады.
Мас күйде көлік жүргізу туралы қылмыстық ісі жабылғаннан кейін басқару құқығы тоқтатылған жүргізушілерге сегіз жыл күтуге тура келеді.
Осыдан кейін медициналық тексеруден өтіп, жол жүрісі қағидаларын білу бойынша теориялық емтихан тапсыру қажет болады.
Тағы оқыңыз: Қазақстанда жүргізуші куәлігінен айыруға не себеп болуы мүмкін? Толық нұсқаулық
Жол жөндеу жұмыстарын айналып өткені үшін айыппұл салына ма? Алматы полициясы жауабы
Сот 89 қазақстандықтың жүргізуші куәлігінің күшін жойды