Қазақстандық кәсіпқой боксшы Қанат Ислам (24-0-0, 19 КО) канадалық Брэндон Кукпен (18-0-0, 11 КО) жекпе-жегінің қарсаңындағы баспасөз мәслихатында Астанадағы кездесуге дайындығы қандай екенін айтты, - деп хабарлайды Vesti.kz.
"Қазақстандағы екінші жекпе-жегім. Кездесуге дайынмын - рингке шығу үшін бір ай тер төккен жоқпыз. 9 қыркүйекте өзімді көрсетсем деймін. Жанкүйерлерімді қуантқым келеді. 9 қыркүйекте отандастарыңызды қолдау үшін келіңіздер", - деді Қанат Ислам.
Сонымен қатар, отандық боксшы бұл кездесудің тарихтағы үздік жекпе-жектердің бірі болады дегенді айтты. "Бокста жүргеніме 20 жыл болды, көптеген жекпе-жек өткіздім, отанына барып тұрып, медалін тартып алып кеткен кездерім болды. Ал туған жеріңде жұдырықтасу үлкен жауапкершілік әрі құрмет. Мен үшін Астанада жұдырықтасу бақыт", - деді ол.
Еске салайық, 9 қыркүйекте Астанада бокс кеші өтеді. Қазасқтандық Қанат Ислам мен канадалық Брэндон Кук арасындағы жекпе-жек сол кештің басты кездесуі болып саналады.
