Орта салмақта IBF және IBO титулдарына ие қазақстандық Геннадий Головкиннің (40-1-1, 35 КО) бапкері Джонатан Бэнкс iFL TV арнасына берген сұхбатында мексикалық Сауль "Канело" Альвареспен (53-1-2, 36 КО) үшінші жекпе-жек қыркүйекте өтпейтінін мәлімдеді, - деп хабарлайды Vesti.kz.
Алдымен Головкин IBF титулына міндетті қарсылас польшалық Камил Шереметамен (21-0, 5 КО) кездесу өткізбек.
"Канелоның" командасы қыркүйектегі жекпе-жекке қатысты қоңырау шалды, мен бас тарттым. Біз Шереметамен кездесу өткізіп, одан кейін тағы бір жекпе-жек жоспарлап отырмыз. Содан кейін ғана "Канеломен" жұдырықтасуға дайын боламыз. Мұның алдында Альварестің командасына жұдырықтасуға дайын екенімізді айтқанбыз, бірақ біздің ұсыныстан бас тартқан. Ол қалағанын жасады. Енді "Канело" Головкинмен жекпе-жек өткізгісі келеді. Бірақ Головкинде өз жоспары бар. Жекпе-жекке шыққысы келсе, ол кейін болады", - дейді Бэнкс.
Қазақстан жаңалықтары. Соңғы жаңалықтар. Telegram желісінде бізге жазыл!
