Шымкент жергілікті полиция қызметінің бұрынғы басшысына қатысты үкім өзгерді

Шымкентте қызмет бабын асыра пайдаланғаны үшін жеті жылға сотталған жергілікті полиция қызметінің бұрынғы басшысы Мұхтар Бұхарбаевтың бас бостандығынан айыру мерзімі екі есеге қысқарды, - деп хабарлайды Tengrinews.kz тілшісі.

Жергілікті полицияның атышулы бұрынғы басшысы биыл қыркүйекте кінәлі деп танылған. Енді апелляциялық сот Мұхтар Бұхарбаевты алаяқтық жасады деп айыптап, жазасын екі есеге қысқартқан.

Зардап шеккен полиция майоры Азамат Айымбетов бұған келіспейді және әділдік іздеуге ниетті.

"Мен соттың жаңа үкімімен келіспеймін. Олардың айтуынша, мен Бұхарбаевтан қандай да бір қызмет сұраппын. Мен ешқандай қызмет сұраған жоқпын, бұл - біріншіден. Мен заңды түрде рота командирі болдым. Сосын "Азамат Айымбетов ондай ақшаны қайдан алды?" дейтіндерге жауап бергім келеді. Ол әкемнің ақшасы болатын. Әкем бизнеспен айналысады. Ол мені үнемі қолдайды, сондықтан мен әкем мен ағамнан ақша алдым", - деді Айымбетов.

Азамат Айымбетовті қорғаушы тарап Жоғарғы сотқа кассациялық шағым түсірмекші. Адвокат Талғат Есімовтің айтуынша, Шымкент прокуратурасы да апелляциялық алқаның шешімімен келіспей және бас прокурордың атына өтініш әзірлеп жатыр.

"Бұл істі Антикор да, ҰҚК тергеу басқармасы да тергеді. Бірқатар куәгерден объектив жауап алынды, оның ішінде оған қарсы болған Бұхарбаевтың жүргізушісі де бар. Біз қандай алаяқтық туралы айтып отырмыз? Шымкенттің апелляциялық соты қандай алаяқтықты көрді? Мен бұған таңғалып отырмын", - деді Айымбетовтің адвокаты Талғат Есімов.

Шымкент қаласының сот алқасында Бұхарбаевқа қатысты жазаны жеңілдету туралы шешім қабылданды. Судьяның айтуынша, Шымкент қаласы ЖПҚ экс-басшысының әрекеті оның қызметтік ұстанымынан шықпаған, осы себепті үкім қайта сараланған.

"Бастапқыда бұл ақшаны қарызға алып жатырмын, қайтарамын дейді. Сосын басшылыққа ұсыныс жазып, рота командирі етіп тағайындауға көмектесемін дейді. Сондықтан басқарма оның әрекетінен алдауды көрді. Бұхарбаевтың оны рота командирі етіп тағайындауға құқығы жоқ, ол тек жоғары тұрған органға ұсыныс жаза алады. Сондықтан алқа оның әрекетін қайта саралады", - деп түсіндірді Шымкент қалалық сотының қылмыстық істер жөніндегі сот алқасының судьясы Низамидин Жамашов.

Еске салайық, Мұхтар Бұхарбаевтың төңірегіндегі жанжал Михаил Козачковтың Telegram-арнасында Шымкент ПД офицері - рота командирі Азамат Айымбетовтің көпшілікке видео үндеуінен кейін туындаған болатын. Жәбірленуші Қазақстан Президенті мен Ішкі істер министріне арызданған. Бұхарбаевтың қоластындағы қызметкері оны қымбат заттарды сатып алуға мәжбүрлегенін айтты. Полиция қызметкерінің мәлімдемесінен кейін іс Шымкент Антикоры бақылауына алынды.

Еске салайық, 25 сәуірінде Бұхарбаев қылмыстық іс жүргізу кодексінің 128, 131-баптарының тәртібінде ұсталып, уақытша ұстау изоляторына қамалған болатын.

Сілтемесіз жаңалық оқисыз ба? Онда Telegram желісінде парақшамызға тіркеліңіз!