Қазақша
Русский
Бөлісу
Unicode консорциумы келесі жылдың көктемінде пайдаланушылардың құрылғыларында пайда болуы мүмкін эмодзилердің жаңа жинағын көрсетті. Ең көп талқыланған нұсқалардың бірі Cracking Face - "шытынаған жүз" болды, - деп хабарлайды Tengri Life тілшісі Engadget мәліметіне сілтеме жасап.
Авторлардың ойынша, бұл эмодзи ішкі жайсыздыққа қарамастан, позитивті көрінуге тырысуды бейнелейтін, шытынап қалған, бірақ күлімсіреген жүзді көрсетеді.
Unicode Emoji кіші комитетінің төрайымы Дженнифер Дэниел (Jennifer Daniel) 17 шілдеде атап өтілетін Дүниежүзілік эмодзи күні қарсаңында тоғыз жаңа эмодзидің алдын ала тізімін ұсынды.
Дэниелдің айтуынша, дәл осы "шытынаған жүз" жаңа символдардың ішіндегі ең танымалы болуы мүмкін.
"Мен Cracking Face бірден ең жиі қолданатын эмодзилерімнің біріне айналатынын қазірден-ақ айта аламын. Ол позитивті көріністің артында адам өзін іштей нашар сезініп тұрғанын білдіретін, шытынаған жүзді бейнелейді", - деді ол.
Жаңа нұсқа басқа эмодзидің орнын басты
Қызығы, бастапқыда Unicode 18 үшін мүлдем басқа смайлик жоспарланған болатын. Былтыр қазанда Unicode Техникалық комитеті (UTC) жаңа эмодзилердің алдын ала тізімін бекіткенде, оған көзі сығырайған жүз (Face with Squinting Eyes) енген еді. Алайда, қаңтарда комитет бұл нұсқадан бас тартып, "шытынаған жүзді" таңдауға шешім қабылдады.
Дженнифер Дэниелдің пікірінше, жаңа дизайн интернеттегі қазіргі қарым-қатынас тәсілдерін жақсырақ көрсетеді.
"Мүмкін, бұл бәрі "қалыпты" сияқты көрінгенмен... іс жүзінде олай болмай тұрған қазіргі заманға ең қолайлы эмодзи шығар", - деп жазды ол.
Сондай-ақ әзірлеушілер сырттай отты тасқа ұқсайтын "метеор" эмодзиіне ерекше назар аударды. Дэниелдің айтуынша, ол бұрыннан бар кометаны қайталамауы тиіс.
"Комета мен метеордың арасында айқын айырмашылық бар. Бірі - аспанда зиянсыз ұшып бара жатқан аспан денесі. Екіншісі динозаврларды жойып жіберген", - деп түсіндірді ол.
Жаңа эмодзи пайда болғаннан кейін, көптеген құрылғылардағы қолданыстағы кометаның кескіні қайтадан үйреншікті - өзіне тән көгілдір мұзды реңкке ие болады.
Пікірлерді оқу
+7 (777) 001 44 99
