Қазақстанда екпе салдырмағандарға қандай жаза қолдану жоспарланып отыр

03 Сәуір, 17:42
0
Қазақстанда екпе салдырмағандарға қандай жаза қолдану жоспарланып отыр - © zi.dn.ua
© zi.dn.ua

Қазақстанда балаларына екпе жасаудан бас тартқан ата-аналарға айыппұл салу ұсынылды, - деп хабарлайды Tengrinews.kz тілшісі. 

Мұндай норманы "Халық денсаулығы және денсаулық сақтау жүйесі туралы кодекске" енгізу жоспарлап отыр. 

"Халық денсаулығы туралы жаңа Кодекс аясында біз азаматтардың өз денсаулығы үшін жауапкершілігін ынталандыруға бағытталған шаралар кешенін талқылаймыз. (...) Көптеген шара алдын алуға, соның ішінде вакцинациялауға бағытталған. Біз аналар мен балалардың денсаулығына бағытталған шаралар кешенін ұсынуды шештік, атап айтқанда, бұл адамдардың уақтылы есепке тұруын ынталандыру.

Сондай-ақ, адамдардың дер кезінде есепке тұрмайтыны, алдын ала тексеруден өтпей, вакцинациядан бас тартатындары үшін әкімшілік жауапкершілікті енгізу қажет. Бұл ұсыныс талқыланып жатыр", - деді денсаулық сақтау министрі Елжан Біртанов 2 сәуірде өткен Үкімет отырысында.

Нұр-Сұлтан қаласының Қоғамдық денсаулық сақтау департаментінің басшысы Сәдуақас Байғабылов бір екпеден бас тартқаны үшін 25 мың теңгеге айыппұл салуды жоспарлап отырғанын айтты.

"Кодекстің жаңа редакциясы аясында өз балаларына екпе салдырудан бас тартқан ата-аналарды әкімшілік жауапкершілікке тарту, яғни 10 АЕК (25 250 теңге) көлемінде айыппұл салу туралы ұсыныс талқыланып жатыр. 

Сондай-ақ, екінші мәселе қарастырылып жатыр - ол екпе жасалмаған жағдайда балабақшаларға қабылдамау. Егер ата-аналар өз балаларын жеке немесе діни наным-сенімдері бойынша екпе салдырмаса, онда бұл балалар иммунитеті әлсіз балаларға қауіп төндіруі мүмкін. Оларды жұқтыруы мүмкін. Бұл кодекстің жаңа редакциясында да талқыланып жатыр", - деп түсіндірді Байғабылов Tengrinews.kz тілшісіне. 

Оның айтуынша, екпе күнтізбесі бойынша әр жоспарлы вакцинациядан бас тартқаны үшін айыппұл салынады. Бала туғаннан 16 жасқа дейін әр түрлі аурулардан екпе ала алады. Мысалы, қызылшадан, қызамықтан, паротиттен, гепатиттен, туберкулезден.

Халық денсаулығы және денсаулық сақтау жүйесі туралы кодекстің жаңа редакциясы мемлекеттік органдарда үйлестіріліп жатыр.

Еске салайық, 1 сәуірден бастап Қазақстанда қызылшаға қарсы вакцинация басталды. Денсаулық сақтау министрлігінде кез келген инфекцияға қарсы вакцинацияға жұмсалатын шығындар осы ауруды емдеу үшін қажетті шығындардан шамамен он есе аз екенін ескертті. Вакцинаны енгізгеннен кейін қорғаныш спецификалық антиденелер (иммуноглобулиндер) пайда болады. Кейбір вакциналар бір реттен-ақ иммунитет жасайды, басқалары қайтадан енгізуге тура келеді.

Жыл сайын Қазақстанда вакцина сатып алуға 27 миллиард теңге бөлінеді. 

Получить короткую ссылку


  • Подписаться на канал новостей TengriNews:

  • Google News
  • Yandex News
  • Yandex Zen

Нравится Поделиться
Пікір қалдырыңыз
Оқылып жатыр
Талқыланып жатыр
Бүгін
Апта
Ай