Алматы полициясы сегіз жастағы қызды қағып кеткен жүргізушіні ұстады, - деп хабарлайды Tengrinnews.kz тілшісі қалалық ІІД баспасөз қызметіне сілтеме жасап. Ол Алғабас ауылының 44 жастағы тұрғыны екен.
"Кешенді жедел-тергеу шаралары барысында Алғабас ауылының тұрғыны 1973 жылғы азамат ұсталды. Ол өзінің "Мазда-626" маркалы көлігін келесі Көксай елді мекеніндегі туыстарының үйіне жасырып қойған. Авотмобиль сотқа дейінгі тергеу материалдарына заттай дәлел ретінде тәркіленді. Анықтау бөлімшесі осы іс бойынша сараптамаларды тағайындаған", - деді полициядағылар.
Жүргізуші өз кінәсін мойындаған. "Ол қорқыныштан оқиға орнынан қашып кеткенін мойындады. Бұрындары ер адамныңқылмыстық жауапкершілікке тартылғаны анықталды", - дейді Алматы ІІД жергілікті полиция қызметінің іздеу бөлімінің басшысы полиция подполковнигі Ерік Насырбеков.
Алматы ІІД-ның Анықтау басқармасының басшысы полиция подполковнигі Рустам Абдрахманов жүргізуші екі бап бойынша қылмыстық жауапкершілікке тартылды: ҚР Қылмыстық кодексінің 345-бабының 3-бөлігі ("Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы") және 347-бабының ("Жол-көлiк оқиғасы болған жерден кетіп қалу"). Тергеу шаралары жалғасады.
