Алматыда тұрғын үйлердің біріндегі аулада болған төбелес видеоға түсіп қалды. Видеодан белгісіз біреулер ер адамды қатыгездікпен ұрып жатқанын көруге болады, - деп хабарлайды Tengrinews.kz тілшісі.
Болжам бойынша, төбелес Ақсай-1 ауданында болған. Оның видеосы Telegram-дағы kris_p_almaty каналында жарияланды.
Видеодан төбелеске қатысушылардың бірі жерде жатқан ер адамды жүгіріп барып тепкенін, кейін бірнеше рет соққы жасағанын көруге болады.
Алматы қаласының полиция департаменті күдіктілердің ұсталғанын хабарлады.
"Жедел іс-шаралар барысында бұл қылмысты жасады деген күдікпен 1987, 1996 және 2000 жылдары туған Жамбыл облысының 3 тұрғыны ұсталды. Олар мас күйде "Ақсай-1" шағын ауданындағы үйлердің біріндегі аулада 34 жастағы жергілікті тұрғынды ұрған", - делінген хабарламада.
Қалалық жедел жәрдем қызметі төбелес болған түні оларға мұрны сынуы мүмкін деген күдікпен ер адам түскенін хабарлады.
"Ол №5 қалалық клиникалық ауруханасына жеткізілді. Жағдайы орташа ауыр", - делінген хабарламада.
Күдіктілер уақытша ұстау изоляторына қамалған. Бұл факт ҚР Қылмыстық кодекстің 293-бабы ("Бұзақылық") бойынша сотқа дейінгі тергеп-тексерудің бірыңғай тізіміне тіркелген.
"Жәбірленуші алған дене жарақатының ауырлық дәрежесін анықтау мақсатында сот-медициналық сараптамасы тағайындалды. Оқиғаның мән-жайы анықталып жатыр", - делінген хабарламада.
Сілтемесіз жаңалық оқисыз ба? Онда "ВКонтакте" желісінде парақшамызға тіркеліңіз!
