Полицейлер кәмелетке толмаған балаға қатысты аса ауыр қылмыс жасады деген күдікпен іздеу жарияланған ер адамды ұстады, - деп хабарлайды Tengrinews.kz тілшісі.
Ресми мәлімет бойынша, күдікті Сарқан ауданындағы тауларда, Тополевка ауылынан 10 шақырым жерде ұсталған. 38 жастағы ер адам қазір аудандық полицияға жеткізілді.
"Ұсталған ер адам 7 қазанда 14 жастағы жасөспірімге қатысты аса ауыр қылмыс жасады деген күдікке ілінді. Қашып кеткен күдіктіні кейінгі екі күнде бірнеше ауданның полицейлері мен облыстық ПД жедел уәкілдері іздестірді", - делінген Жетісу облыстық полициясының хабарламасында.
Іздеудегі ер адам туралы ақпарат әлеуметтік желілерде жарияланып, облыстағы барлық полиция бөлімдеріне жолданған.
"Бұл факт бойынша ҚР Қылмыстық кодексінің 121-бабы 3-1-бөлігі ("Кәмелетке толмаған адамға қатысты сексуалдық сипаттағы зорлық-зомбылық әрекеттері") бойынша тергеу амалдары жүргізіліп жатыр. Қылмыстық іс ерекше бақылауға алынды", - дейді Жетісу облыстық Полиция департаментінің баспасөз қызметі.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
