Massaget.kz редакциясы көптен күткен мобильді қосымшасын іске қосты, - деп хабарлайды Tengrinews.kz тілшісі.
"Расында бұл қосымшаны бәріміз көп күттік. Оқырмандарымызға сайттың 6 жылдығы қарсаңында жақсы бір сыйлық болды деп ойлаймыз. Себебі, соңғы бір жылда осы өтінішпен редакцияға көптеген хат келіп түсті", - дейді редакция өкілдері.
Айтуларынша, мобильді қосымша тек Android операциялық жүйесіне арнап жасалған.
"Әзірше тек Android-та жасауымыздың себебі елімізде жыл басында смартфон қолданушыларының 73,16 пайызы Android-ты пайдаланса, 23,53 пайызы IOS-ты тұтынған. Ал Google Analytics платформасына сенсек, порталымызға смартфон арқылы кіретін оқырмандардың Android-ты пайдаланатындары 84,83 пайызды құрайды екен. Ал 15,17 пайызы IOS жүйесін пайдаланады. Осы үлес салмақты есепке алып, бірінші кезекте Android-та іске қосуды жөн санадық. Бірақ, болашақта Apple қолданушыларын да қуантамыз", - деп түсіндірді бұл таңдауын редакциядағылар.
Қосымшаны Play Market (Google Play) қолданбалар дүкенінде оңай орнатуға болады екен. Немесе мына сілтемеге өту арқылы жүктеуге болады.
Сондай-ақ, редакция өкілдері мобильді қосымшаға байланысты сұрақтар не ұсыныстары болса, хат жолдауға болатынын айтады.
"Алдағы уақытта талап-тілектеріңізді ескеріп, мобильді қосымшаны жаңартып отырамыз. Сіздердің ойларыңыз біз үшін аса маңызды!", - деді редакция ұжымы.
