Әблязов пен Храпунов ісі: АҚШ-та соңғы сот тыңдалымы қашан өтетіні айтылды

АҚШ сотында Мұхтар Әблязов пен Виктор Храпуновқа және оның ұлы Ілиясқа қатысты іс ақыры қаралатын болды. Қашқын олигархтарға жүздеген миллион долларды жымқырды деген айып тағылып отыр. Атышулы Flatotel ісіне осымен алтыншы жыл. Әділет министрлігі осы уақыт аралығында Нью-Йорктегі зәулім тұрғын үй кешенінің құрылысына қос құда "БТА банк" пен Алматы бюджетінен ұрланған қаржысын құйғанын дәлелдеумен келеді., - деп хабарлайды Tengrinews.kz тілшісі КТК телеарнасына сілтеме жасап. 

Flatotel ісінің басы-қасында жүрген Қазақстан Үкіметінің кеңесшісі Мэттью Шварц сот қашан аяқталатынын және осы іс бойынша бұғатталған 24 миллион долларға жуық ақшаны кім алатынын айтты.

"Әблязов пен Храпунов "БТА банк" пен Алматы қазынасынан ұрланған ондаған миллион долларды жасыру мақсатында Flatotel-ге құйған. Оның бірнеше себебі бар. Біріншіден, бұл жылжымайтын мүлік саласындағы үлкен жоба. Жобаға көп қаражат керек болды. Ал жылжымайтын мүлікті қылмыскерлер ақша жымқыру мақсатында пайдаланатыны белгілі. Ондай мысалдар жеткілікті. Ілияс Храпунов құрылыс компаниясының басшысы Четритпен жақын танысып, жобаға инвестиция құятынын айтқан. Ақшаны қуана-қуана алған Четрит артық сұрақ қоймаған. Осы комбинация арқылы олар ұрланған ақшасын АҚШ-та жасыруға тырысқан", - деді ҚР Үкіметінің кеңесшісі, Boies Schiller Flexner LLP серіктесі Мэттью Шварц.

Flatotel - Нью-Йорк қаласының қақ ортасындағы тұрғын үй кешені. Оның жанында әйгілі Таймс-сквер мен Мэдисон-сквер-Гарден тұр. Қашқын миллионерлер жобаға жалған ұйымдар арқылы қыруар қаржы құйған. Қазақстан билігі осы құйтырқы әрекетті білген соң, экс-банкир мен Алматының бұрынғы әкімі дереу өз үлестерін екі есе арзанға сатып, сытылып кетпек болған. Олар дәлел-дәйектердің көзін құртуға тырысыпты. Яғни Ілияс Храпунов маңызды деген электронды хаттар мен құжаттарды жойып тастаған. "Тергеуге қажетті мәліметтерді жойғаны үшін бұл үшеуі айыппұл арқалады", - дейді Мэттью Шварц.

Соттың соңғы тыңдалымы келер жылдың 7-ақпанына жоспарланған. Процесс шамамен үш аптаға созылады. Ал қос қашқынның бұғатталған есепшотындағы 24 миллион доллар Қазақстанға қайтарыла ма, жоқ па? Ол сот шешімінен кейін белгілі болады.

"Біз Flatotel-ге құйылған активтерін анықтап, оған бұғат салдық. Бұл біздің осы істегі алғашқы жеңісіміз және сотта жеңіске жетеміз деген сеніміміз артты. Судья 23,5 миллион АҚШ доллары тұрған есепшотты бұғаттап, бақылауда болатынын жеткізді. Аталған қаржы сотта жеңген тарапқа беріледі", - деді ҚР Үкіметінің кеңесшісі, Boies Schiller Flexner LLP серіктесі Мэттью Шварц.

Бұған дейін Нью-Йорк соты Әблязов пен Храпуновтың ісін қарайтын болғаны хабарланған еді. 

Сілтемесіз жаңалық оқисыз ба? Онда "ВКонтакте" желісінде парақшамызға тіркеліңіз!