+7 (777) 001 44 99
Қазақша
Русский
English
Экономикалық сот Ақтөбе облысы Бестамақ ауылындағы шошқа фермасының қызметін қалдық су ағызғаны үшін тоқтату туралы шешім шығарды. Бұдан басқа, биологиялық қалдықтар қоймасын пайдалануға тыйым салынды, - деп хабарлайды Tengrinews.kz тілшісі КТК телеарнасына сілтеме жасап.
Шошқа фермасының иелеріне қатысты қатаң шаралар кәсіпорында экологиялық нормалар өрескел бұзылғаны белгілі болғаннан кейін қолданылды. Бастапқыда бұл туралы кәсіпорын орналасқан Бестамақ ауылының тұрғындары хабарлады. Жоспардан тыс тексеру барысында шошқа фермасындағы барлық өндірістік және биологиялық қалдық, тұрмыстық және құрылыс қалдықтары ауылдың жанындағы орға көмілгені белгілі болды. Ол жердің аумағы - 6 гектарға жуық. Тексерушілер 200 тоннаға жуық қалдықты қазып шығарды. Бұдан басқа, кәсіпорын екі жыл бойы қоршаған ортаға эмиссия болмай, рұқсатсыз жұмыс істегені анықталды. Фермада жобада айтылған 40 мың шошқаның орнына 50 мыңнан аса шошқа болған. Барлық заңбұзушылықтан келген жалпы залал 7 миллиард теңге болды.
"Жинақтауыш тоғандарға және жергілікті территорияға өндірістік қалдық суды ағызу бөлігінде серіктестіктің шаруашылық қызметі тоқтатылды. Сондай-ақ заңбұзушылық жойылғанға дейін биологиялық қалдықтар қоймасын пайдалануға тыйым салынды. Жауапқа тартылған мекеме қоршаған ортаға эмиссияға рұқсат алу мүмкіндігінен айырылды", - деді судья Жанар Жұбатова.
Айта кетейік, былтыр 19 қарашада Ақтөбе облысы Алға ауданы Бестамақ ауылының 80-нен астам тұрғыны шошқа фермасын жабуды талап етіп, наразылыққа шыққаны хабарланған. Кейін шошқа фермасының иесі Гайк Тертерян кәсіпорын қандай жағдайда жабылатынын айтқан еді.
Сілтемесіз жаңалық оқисыз ба? Онда "ВКонтакте" желісінде парақшамызға тіркеліңіз!
