Грекиядан Қазақстанға аса ірі көлемде алаяқтық жасады деген күдікпен әйел экстрадицияланды. Қылмыс 2021 жылы жасалған, деп хабарлайды Tengrinews.kz Бас прокуратура сайтына сілтеме жасап.
Бас прокуратура мәліметінше, күдікті Алматыдағы тасымалдау компанияларының бірінде бухгалтер болып жұмыс істей отырып, басшысынан 230 000 долларды сейф ұяшығында сақтау сылтауымен алып, оны иемденіп, қашып кеткен. Осыдан кейін оған халықаралық іздеу жарияланды.
"2024 жылғы маусымда ол Грекия аумағында ұсталып, Бас прокуратураның сұрауы бойынша Отанына экстрадицияланды. Қазақстан мен Грекия арасында тікелей әуе қатынасының болмауына байланысты оны Сербия аумағы арқылы транзиттік тасымалдауды ұйымдастыруға Қазақстанның осы елдегі елшілігі қолғабыс көрсетті", - делінген хабарламада.
Күдікті Астананың тергеу изоляторына қамалды.
Прокуратура ақпаратына сәйкес, оған тағылған қылмыс үшін мүлкі тәркіленіп, белгілі бір лауазымдарды атқару немесе белгілі бір қызметпен айналысу құқығынан он жылға дейінгі мерзімге айыра отырып, он жылға дейінгі мерзімге бас бостандығынан айыру жазасы көзделген.
