ҚР Денсаулық сақтау министрлігі Қазақстанда COVID-19 экспресс-тест тексеруінен кімдер өтетінін айтты, - деп хабарлайды Tengrinews.kz тілшісі.
Экспресс-тест өткізу үшін пациенттермен сауалнама жүргізіледі.
Тест өткізу рәсімін оңайлату үшін formcovid.eisz.kz сайтында пациент деректері енгізілетін сауалнама үлгісі жасалды.
Бiр реттік тексеруден өтетін азаматтар санаты:
- тыныс алу жүйесінің ауруларымен диспансерлік есепте тұрған адамдар;
- респираторлық белгілері бар ауруханаға жатқызылмаған науқастар.
- автомобиль өткізу пункттері мен темір жолдардағы мемлекеттік шекара өткізу пункттері арқылы Қазақстанға кіретін азаматтар;
- орталық және жергілікті мемлекеттік органдардың қызметкерлері.
- карантиндік аймақтардың тұрмыс-тіршілігін қамтамасыз ететін кәсіпорындардың қызметкерлері.
Жалпы, Нұр-Сұлтан және Алматы қалаларында 220 000 адамға дейін экспресс-тест тексеруінен өте алады.
"Экспресс-тест арқылы коронавирус инфекциясына диагноз қойылмайтынын атап өту маңызды, өйткені ол ағзадағы вирусты анықтамайды, вирусқа деген иммундық жүйенің реакциясын бағалайды.
Экспресс-тестке сенімділік деңгейі 90 пайыздан аспайтынын атап өтеміз, сондықтан жағдайлардың 10 пайызына дейін әрі жалған-оң, әрі жалған-теріс нәтиже беруі мүмкін", - делінген хабарламада.
Бүгінгі таңда Қазақстан бойынша 1 962 адам карантинде жатыр. 11 232 адам үйде оқшауланып отыр.
Қазақстан жаңалықтары. Соңғы жаңалықтар. Telegram желісінде бізге жазыл!