Жануарларды чипі жоқ болғаны үшін емес, иесінің болмауына байланысты қаңғыбас деп тану керек. Сенат депутаттары жануарларға жауапкершілікпен қарау туралы заң жобасын қарау кезінде осындай ұсыныс енгізді, деп хабарлайды Tengrinews.kz тілшісі.
Мәжіліс ұсыныстарын қарау барысында Сенат депутаттары "қаңғыбас жануарлар" анықтамасындағы даулы тұсқа назар аударды. Қабылданған заңда арнайы чипі жоқ иттер мен мысықтарды осы санатқа жатқызу ұсынылған болатын.
"Біз жануарларды чипі жоқ болғаны үшін емес, иесінің болмауына байланысты қаңғыбас деп тану керек деп есептейміз", - деп атап өтті депутат Арман Өтеғұлов.
Сенаторлардың пікірінше, міндетті чиптің болуы туралы норма іс жүзінде үй жануарларының қателесіп қаңғыбас деп танылуына және соның салдарынан болатын келеңсіз жағдайларға әкеп соғуы мүмкін.
Осыған байланысты заңнамадағы қолданыстағы норманы сақтап қалу ұсынылады: қаңғыбас жануардың негізгі белгісі чип сияқты есепке алу құралының болуы емес, дәл иесінің жоқтығы болуы тиіс. Сенаторлар бүгінгі таңда үй жануарларының бәрі бірдей чиптелмеген, сондықтан мұндай түзету құқық қолдану тәжірибесіндегі ықтимал тәуекелдер мен бұрмалауларды жоятынын айтты.
