Орта салмақта бақ сынайтын кәсіпқой боксшы Мейірім Нұрсұлтанов Инчхонда өткен бокс кешінде жеңіліп көрмеген жапон боксшысы Кадзуто Такесаконы нокаутпен ұтып, WBO International чемпиондық белбеуін сәтті қорғады, - деп хабарлайды Tengrinews.kz тілшісі.
12 раундқа жоспарланған жекпе-жек 8-раундта аяқталды. Мейірімнің ширақ шабуыл, жойқын сериялы соққыларынан кейін жапон боксшысы ес жия алған жоқ. Төреші шаршы алаңдағы шайқасты тоқтатты.
Қазақстандық боксшы қарсыласын үшінші раундта-ақ ұтып шығатын сәт болған. Алайда Кадзуто Такесако жылдам ес жиып, соққыларға шыдас бере білді.
Мейірім Нұрсұлтанов кәсіпқой бокстағы 19-шы жеңісіне қол жеткізді. Бірде-бір рет ұтылмаған. Ал жапон боксшысы алғаш рет жеңілістің кермек дәмін татты.
Инчхондағы бокс кешінде тағы бір отандасымыз Нұрсұлтан Аманжолов та жекпе-жек өткізді. Ол жергілікті боксшы Ан Сук Хиді нокаутпен жеңді.
Сілтемесіз жаңалық оқисыз ба? Онда Telegram желісінде парақшамызға тіркеліңіз!