Қазақстан Президенті Қасым-Жомарт Тоқаев Қазақстан экономикасын санкциялық сын-қатерге дайындауды тапсырып, оның күрделігін елемеуге болмайтынын ескертті, - деп хабарлайды Tengrinews.kz тілшісі.
"Мен Қауіпсіздік кеңесінде бірқатар кездесу өткіздім. Үкімет алдына санкциялық текетірестің шиеленісуі жағдайында елдің орнықты әлеуметтік-экономикалық дамуын қамтамасыз ету жөнінде нақты міндет қойдым. Дағдарыс жағдайында үздіксіз жұмысты қамтамасыз ету үшін экономикамыз санкциялық сын-қатерлерге дайын болуы керек. Алдағы сын-қатерлер мен қиындықтарды бірге еңсереміз деп ойлаймын. Олардың күрделігін елемеуге болмайды. Бірақ асыра сілтеуге де болмайды", - деді Мемлекет басшысы Nur Otan партиясының кезектен тыс съезінде (Amanat деп аталды).
Бұған дейін Тоқаев Қазақстан Ресей мен Украина арасындағы жанжалды реттеуге, соның ішінде медиация қызметтерін көрсетуге жан-жақты көмек көрсетуге дайын екенін айтқан болатын.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
