Қазақстанның Сауд Арабиядағы елшілігінің өкілдері Туризм министрлігінің қазақстандықтарға виза беруді тоқтату туралы шешімін түсіндірді, - деп хабарлайды Tengrinews.kz тілшісі.
"Сауд Арабиясының билігі 27 ақпаннан бастап COVID-19 вирусының таралуын алдын алу мақсатында барлық елдің азаматына виза беруді тоқтату туралы шешім қабылдады. Коронавирус тіркелген елдердің азаматтарына, сондай-ақ, сол елдермен шекаралас мемлекеттердің, олардың қатарында ТМД елдерінің азаматтарына виза беру тоқтатылды", - деп түсіндірді елшіліктегілер.
Еске салайық, мұның алдында коронавирусқа байланысты Мекке мен Мәдина қалаларына кіру уақытша тоқтатылғаны хабарланған болатын. "Сауд Арабиясы корольдігіне және Пайғамбар мешітіне кіру уақытша тоқтатылды", - делінген еді хабарламада.
