Тараз әуежайы қолайсыз ауа райына байланысты рейстер қабылдауды тоқтатты, - деп хабарлайды Tengrinews.kz тілшісі әуежайдың анықтама қызметіне сілтеме жасап.
Күшті желдің салдарынан Тараздан Астанаға ұшатын және кері бағыттағы рейс жеті сағатқа кешіктірілген. SCAT әуе компаниясының ұшағы 14.15-те ұшуы тиіс болған, енді 21.00-де ұшпақ. "Бүгін бізде екі рейс қана. Алматы бағытындағы рейстер кестеге сай аттанады. Кейінге қалдырылған жоқ", - деп хабарлады әуежай қызметкерлері.
Білім және ғылым министрінің бұрынғы орынбасары, жемқорлыққа қарсы "Жаңару" жалпыұлттық қозғалысы төрағасының орынбасары Мұрат Әбенов Instagram-дағы бетінде Астанадан шығатын рейстің кідіруіне байланысты "Қазақстан-Тараз" телеарнасындағы тікелей эфирге үлгере алмайтынын хабарлады.
Бұған дейін "Қазгидромет" кәсіпорны 28 шілде күні Жамбыл облысында дауыл болатыны туралы ескерту жариялаған еді. Өңірде оңтүстік-батыстан 18-23 м/с жел соғып тұр, күндіз кей жерлерде жел екпіні секундына 30 метрден асады. Бофорттың 12 балдық шкаласы бойынша мұндай құбылыс 8-9 деңгейлі жел делінеді, ол ағаштарды сындырып, шатырларды ұшырады. Тараз әуежайы соған байланысты рейстерді қабылдай алмай отыр.
