ҰБТ-ның бірінші күнінің қорытындысы жарияланды, - деп хабарлайды Tengrinews.kz тілшісі ҚР Білім және ғылым министрлігінің баспасөз қызметіне сілтеме жасап.
Ведомствоның мәліметінше, ҰБТ 44 пунктте өткізілді. Оған өтінім берген 18 599 түлектің 17 934-і қатысты. (13 026 - қазақ тілі, 4 908 - орыс тілі). Сонымен қатар, төрт түлектің бірнеше мәрте ереже бұзғанына байланысты тестілеуден шығып қалғаны және тестілеу қорытындыларының жойылғаны айтылады.
Мұнымен қатар, сынақтан өтушілерден тыйым салынған 8 522 зат алынған. Айта кетейік, 2015 жылы 7 712 зат алынған болатын. Ал орташа балл - 83,7 (өткен жылы 79,7 балл). Министрліктегілердің айтуынша, көрсеткіштің жақсаруы ҰБТ-ға жақсы дайындықтың нәтижесі екен.
Ал 50 балл шектік межесіне 2 277 түлек жете алмаған (12,6 пайыз). Ал 125 баллды Алматы қаласының үш түлегі алыпты. Олар - Ыбырай Алтынсарин атындағы №159 мектеп-гимназиясының екі түлегі және №12 мектеп-гимназиясының бір түлегі екен. Ал 100 баллдан жоғары алғандардың саны - 3834.
Айта кетейік, осыған дейін КТК телеарнасы Алматыда 5 түлектің ең жоғары балл алғанын хабарлаған болатын.
