"Қазақстанның Бас санитарлық дәрігері Жандарбек Бекшин 9 сәуір күні украин ірімшігінің кей түрлерін ел аумағына әкелуге және сатуға тыйым салатын қаулыға қол қойды" - деп хабарлайды Tengrinews.kz тілшісі.
"Мен "Ахтырский" сыр комбинатының "Рось" бөлімшесі, "Пирятинский сыр-комбинат" АҚ-ы, «Гадячсыр» ААҚ-ы, «Золотошский май өндіру комбинаты», «Техмолпром» ААҚ-ы өндірген ірімшіктерді Қазақстан аумағына әкелуге және сатуға санитарлық шаралар негізінде уақытша тыйым салатын қаулыға қол қойдым» - дейді Бекшин.
Оның сөзіне қарағанда, қаулы 9 сәуірде қол қойылған сәттен бастап күшіне енген. 10 сәуір күні қаулы аймақтық органдарға, Ұлттық кәсіпкерлер палатасына және өзге де қажетті органдарға жіберілген.
Бекшиннің хабарлауынша, мән-жайды анықтағанға дейін қаулы күшінде қалады. Қаулы 2009 жылдың 11 желтоқсанындағы Кедендік одақтың санитарлық шаралар туралы келісімі бойынша "Халық денсаулығы және денсаулық сақтау жүйесі туралы" Кодекстің 21-бабына, сондай-ақ "Тұтынушылардың құқығын қорғау туралы" Кодекстің 2,4 тармағы негізінде шығарылып отыр.
"Осыған орай, облыстық бас санитарлық дәрігерлерге тасымалдаушыларды құлақтандыру тапсырылды. Санитарлық-гигиеналық бақылау департаменті мен Тұтынушылар құқығын қорғау агенттігіне Ресей мен Беларусьтің өкілетті органдарына санитарлық шараларға орай, жоғарыда көрсетілген өндірушілердің өнімін Қазақстан аумағына тасымалдауға, сатуға тыйым салынғаны туралы хабарлама беру тапсырылды» - деп атап өтті Бекшин.
Естеріңізге сала кетсек, жоғарыда аталған ірімшік өндіруші кәсіпорындардың өнімдерін Ресей аумағында сатуға тыйым салынған.