+7 (777) 001 44 99
Автокөліктегі жағымсыз көгерген иіс тек дымқылдың салдары ғана емес, сонымен қатар зеңнің пайда болғанын білдіруі мүмкін. Зең салонның ішкі әрлеуін бүлдіріп қана қоймай, жүргізуші мен жолаушылардың денсаулығына да зиян тигізуі мүмкін, деп хабарлайды Tengri Auto.
Зең споралары аллергиялық реакцияларды, бронх демікпесінің ұстамаларын және шырышты қабықтардың тітіркенуін тудыруы мүмкін. Әсіресе балалар, қарттар және тыныс алу жолдарының созылмалы аурулары бар адамдар оған аса сезімтал келеді.
Көлікте зең пайда болғанын қалай түсінуге болады?
Ең айқын белгі - орындықтарда, ковролинде, төбеде немесе есік қаптамаларында ақ, сұр, жасылдау немесе қара дақтардың пайда болуы. Дегенмен, көбінесе бұл мәселе дымқылдың өзіне тән иісімен білінеді, ол әсіресе кондиционерді қосқанда қатты сезіледі.
Егер жол жүру кезінде түшкіру, жөтел, көздің тітіркенуі немесе мұрынның бітелуі пайда болып, ал көліктен шыққан соң бұл белгілер басылса, оған зең себеп болуы мүмкін.
Жаңа автокөлікте зең пайда болуы мүмкін бе?
Көптеген жүргізуші зең тек тығыздағыштары ескірген және желдету жүйесі тозған көне көліктерде ғана пайда болады деп есептейді. Іс жүзінде бұлай емес.
Зеңнің пайда болуының басты себебі - көліктің жасы емес, жоғары ылғалдылық. Егер салонда үнемі суланған кілемшелер жатса, жаңбырдан немесе жуудан кейін су жиналса, кондиционердің дренаждық тесіктері бітеліп қалса немесе еден жабыны ұзақ уақыт кеппесе, зеңнің дамуына қолайлы жағдай небәрі бірнеше күнде жасалуы мүмкін.
Бұл үдеріс әсіресе жазда жылдам жүреді. Жоғары температура мен ылғалды ауа жабық көлік салонын бактериялар мен зеңнің көбеюіне таптырмас ортаға айналдырады. Бұл ретте алғашқы белгілер ұзақ уақыт бойы байқалмауы мүмкін: алдымен әрең білінетін дымқыл иісі шығады, ал зеңнің көрінетін іздері әлдеқайда кеш пайда болады.
Сондықтан мамандар қаптамада дақтардың пайда болуын күтпеуге кеңес береді. Егер салонда үнемі дымқылдық сезілсе, терезелер себепсіз буланса немесе кондиционерді қосқаннан кейін көгерген иіс шықса, ылғалдың көзін мүмкіндігінше ертерек тауып, оны жою қажет.
Зең қайдан пайда болады?
Көбінесе бұл мәселе салонда ұзақ сақталған ылғалдан туындайды. Оның бірнеше себебі болуы мүмкін:
- жаңбыр кезінде терезенің ашық қалуы;
- дренаждық тесіктердің бітелуі;
- су кілемшелер мен аяқ киім;
- төгілген сусындар;
- люк, есік немесе тығыздағыштар арқылы судың өтуі.
Шаң-тозаң, шаш, жануарлардың жүні, тамақ қалдықтары және басқа да органикалық ластанулар да қосымша әсер етеді.
Зең көбінесе қай жерде пайда болады?
Көбінесе зең мына жерлерде дамиды:
- ковролин астында;
- қосалқы дөңгелектің астында;
- жүк салғыш қуыстарында;
- еденнің дыбыс оқшаулағышында;
- кондиционер буландырғышында;
- су тиген жағдайда артқы орындықтың астында.
Көлік иелері тек көрінетін беттерді ғана тазалайды, бірақ негізгі мәселе әлдеқайда тереңде болуы мүмкін.
Неліктен кондиционерді қосқанда дымқыл иісі шығады?
Қозғалтқышты тоқтатқаннан кейін кондиционер буландырғышында ылғал қалады. Егер көлік желдетілмей ұзақ тұрып қалса, жылы ортада бактериялар мен зең көбейе бастайды. Сондықтан жағымсыз иіс көбінесе кондиционерді қосқаннан кейінгі алғашқы минуттарда пайда болады.
Зеңнен қалай арылуға болады?
Егер дақтар пайда болып қойса, жай ғана тазалау жеткіліксіз болуы мүмкін. Алдымен салонды мұқият кептіріп, содан кейін ластануды кетіріп, зақымдалған жерлерді зеңге қарсы арнайы құралдармен өңдеу қажет.
Фото: depositphotos.com
Егер жағымсыз иіс ауа өткізгіштерден шықса, салон сүзгісін тексерген жөн. Ластанған сүзгі жиі дымқыл иісінің шығуына себеп болады. Егер оны ауыстыру көмектеспесе, кондиционерлеу жүйесін кәсіби тазалаудан өткізу ұсынылады.
Жалпы алғанда, мұндай тазалауды жылына бір рет жүргізген абзал: бұл тек зең мен жағымсыз иістерді жоюға ғана емес, сонымен қатар бүкіл кондиционерлеу жүйесі мен оның құрамдас бөліктерінің (компрессор және т.б.) жұмысына оң әсер етеді.
Егер салон сүзгісін ауыстырып, салонды кептіріп, кондиционерді тазалағаннан кейін де иіс кетпесе, онда зең шу оқшаулағышқа немесе кілем жабынына өтіп кеткен болуы мүмкін. Мұндай жағдайда салонды жартылай бөлшектеп, кәсіби химиялық тазалау жасамайынша, мәселені шешу қиын болады.
Фото: depositphotos.com
Зеңнің пайда болуына қалай жол бермеуге болады?
Мәселенің алдын алу, онымен күресуден әлдеқайда оңай. Ол үшін бірнеше қарапайым ережені сақтау жеткілікті:
- салонды үнемі шаңсорғышпен тазалап тұру;
- төгілген сұйықтықты дереу сүртіп алу;
- автокөлік ішінде су болған кілемшелер мен киімдерді қалдырмау;
- тығыздағыштар мен дренаж тесіктерінің күйін бақылау;
- салон сүзгісін уақытында ауыстыру;
- жаңбырдан немесе жуудан кейін салонды мезгіл-мезгіл кептіріп тұру.
Резеңке кілемшелер де тиімді шешім бола алады. Олар ылғалды сіңірмейді, оңай тазаланады және кілем жабынының құрғақ сақталуына көмектеседі.
Егер көлікте балалар немесе үй жануарлары жиі тасымалданса, орындықтарға қорғаныш қаптарын кигізген жөн - бұл тазалауды жеңілдетіп, қаптаманы ылғал мен кірден қорғайды.
Салонда бірнеше күнге қалып қойған аздаған ылғалдың өзі зеңнің пайда болуына себеп болуы мүмкін. Сондықтан автокөлікті жүйелі түрде тазалау және дер кезінде кептіру жағымсыз иістен ғана емес, сонымен қатар қымбат химиялық тазалау шығындарынан құтылуға көмектеседі.