+7 (777) 001 44 99
Африкаға саяхаттау көпшілік үшін әлі де күрделі әрі тәуекелі жоғары қадам болып көрінгенімен, қазақстандық туристер бұл құрлықты өздері үшін ашуды жалғастырып келеді. Қазақстандық Жазира Ығылман Занзибар мен Кенияға жасаған саяхаты туралы айтып берді. Мұндай тур қанша тұрады және не нәрсеге дайын болу керек - Tengri Travel материалынан оқыңыз.
Бәрі қалай басталды?
Жазира мұнай-газ саласында жұмыс істейді, ал бос уақытын саяхатқа арнайды. Соңғы он жылда ол ондаған сапарды өз бетінше ұйымдастырған және ерекше бағыттарды ерекше ұнататынын айтады. Бұл жолы таңдау Африкаға түсті.
"Маған саяхаттарды өз бетімше ұйымдастырған ұнайды. Бұл көбірек еркіндік береді: сапар барысында маршрутты өзгертуге немесе көрші елге кенеттен аттанып кетуге болады. Занзибар Африкадағы менің алғашқы бағытым болды, одан кейін Кенияға, Найробиге ұштық", - деді ол.
Жазира сапарға бірге шығатын серікті әлеуметтік желі арқылы табуды ұйғарған.
"Мен бірнеше бағыт бойынша жолсерік іздейтінім туралы хабарландыру жарияладым. Жанар есімді келіншек жауап берді. Ол да саяхаттауды жақсы көреді екен. Африканы бірге таңдадық: тап-таза мұхитты және әйгілі африкалық "алтын бестікті" көргіміз келді", - деп еске алады саяхатшы.
Сапарға дейін қыздар бірде-бір рет бетпе-бет кездеспеген. Жазира Астанадан, Жанар Алматыдан ұшып шықты. Олар Дубайдағы ауысып отыру кезінде ғана танысқан.
"Біз Дубай әуежайында кездесіп, сол жерде бір-бірімізді алғаш рет көрдік. Занзибарға дейінгі бүкіл жол ауысып отыруды қосқанда шамамен 12 сағатқа созылды", - деді ол.
Интернет арқылы танысқандарына қарамастан, саяхатшының бойында ешқандай қауіп болмаған.
"Менімен бірге ұшуға келіскен мүлдем бейтаныс әйелді таптым, кейін екеуміз дос болып кеттік. Қорқыныш болған жоқ. Барлық ақпаратты алдын ала интернеттен зерттеп алдық", - деп атап өтті ол.
Жазираның айтуынша, сапарды ұйымдастыру айтарлықтай оңай болған.
Билеттерді, сақтандыруды және визаларды ресімдеуге небәрі бірнеше күн кеткен. Занзибарға кіру үшін туристерге құны 44 доллар тұратын жергілікті сақтандыру және 50 долларлық виза қажет.
"Сақтандыруды онлайн ресімдедік, ал визаны ұшып келген соң алдық. Шекарада бәрі оңай болды, қызметкерлер не істеу керектігін айтып отырды", - деп бөлісті ол.
Instagram-дағы бұл жарияланымды көру
Занзибардан алған алғашқы әсерлер
Қыздар алғашқы үш күнді жергілікті көрікті жерлермен танысу үшін қала орталығында өткізген. Жазираның айтуынша, алғашқы әсерлер әртүрлі болған.
"Танзания - бай ел емес, бұл бірден байқалады. Алғашқы әсерім бойынша, жергілікті тұрғындар әлі де сервис көрсетуге аса бейімделмеген, ал қаланың өзі айтарлықтай кір болып көрінді", - деді ол.
Дегенмен, қауіпсіздікке қатысты сұрақтар туындамаған.
"Біз тіпті жалғыз өзіміз де еркін серуендедік. Жалғыз мәселе - экскурсия ұсынатын делдалдар өте көп. Оларды GetYourGuide немесе Klook сияқты тексерілген сервистер арқылы брондаған дұрыс", - деп бөлісті саяхатшы.
Ең басты жаңалық мұхит болды.
"Барлық үмітіміз жүз пайыз ақталды. Су керемет таза әрі мөлдір. Әсіресе судың қайтуы таңғалдырды - мұндай ауқымды құбылысты бұрын-соңды көрмегенмін. Таңертең су жағадан алысқа кетіп, тек түске қарай қайта оралатын", - деді қазақстандық.
Жазира ең жарқын әсерлердің қатарында аппақ жағажайларды, дельфиндерді және демалыс бағасының қолжетімділігін атады.
Фотоны Жазира ұсынған
Занзибарда қайда тұруға болады?
Алғашқы күндері саяхатшылар қала орталығындағы тарихи Mizingani қонақүйін таңдаған.
"Таңғы асы өте жақсы, бөлмелері кең, қызметкерлері ілтипатты және бағасы қолайлы. Бұл қонақүйді сеніммен ұсына аламын", - деді Жазира.
Ал екінші нұсқа онша сәтті болмаған. Жағалауда қыздар Aluna қонақүйіне тоқтаған.
"Оны ұсынбаймын. Қасында мектеп орналасқан, сондықтан аптаның қай күні екеніне қарамастан, таңнан кешке дейін шу болып тұрды", - деп атап өтті ол.
Демалыс қанша тұрады?
Сапар кезінде тілдік кедергілер дерлік болмаған.
"Мен ағылшынша сөйлеймін, ал жергілікті тұрғындар ағылшын тілін мектепте оқиды. Бізге тіпті орысша сөйлейтін гидтер де кездесті", - деді саяхатшы.
Интернет те қолжетімді болып шықты.
"Wi-Fi барлық жерде дерлік - қонақүйлерде, мейрамханалар мен кафелерде болды. Біз тіпті сим-карта да сатып алмадық", - деп атап өтті ол.
Есеп айырысу үшін банктік карталарды, долларды немесе жергілікті шиллингтерді пайдалануға болады. Жазираның айтуынша, сегіз күндік саяхат бір адамға шамамен 2200 долларға түскен. Бұл сомаға ұшу билеттері, тұру, тамақтану және ойын-сауық шығындары кірді.
"Меніңше, мұнда демалу Таиланд немесе Вьетнамға қарағанда арзанырақ. Тұрғын үйден ақша аямаған жөн, ал экскурсиялар мен мейрамханаларды бюджетке қарай таңдауға болады - олардың сапасы көбіне бірдей болып қалады", - деді саяхатшы.
Фотоны Жазира ұсынды
Туристер не көре алады?
Ең қызықты жерлердің ішінен Жазира бұрынғы құл базарын, Призон-Айленд түрме-аралын және архипелагтағы ең әдемі күн батуын тамашалауға болатын Накупенда аралын көруге кеңес береді.
Саяхатшы кемшіліктердің қатарында қызметтерін өткізуге тырысатын сатушыларды тағы да атап өтті.
"Олар әр қадам сайын кездеседі. Бірақ оларды түсінбейтініңізді немесе қызығушылық танытпайтыныңызды көрсетсеңіз, тез кетеді", - деді ол.
Занзибарға баратындарға кеңестер
Жазира сәнді қонақүйлерге артық ақша жұмсамауға кеңес берді.
"Жақсы "үштік" немесе "төрттік" қонақүй де жеткілікті болады", - деп атап өтті ол.
Сондай-ақ ол таксистермен саудаласуға кеңес берді.
"Бағаны көбіне екі есеге дейін түсіруге болады. Әуежайдан трансферге де солай - көлікті сол жерден іздеген тиімдірек", - деді саяхатшы.
Жергілікті тауарлардан саяхатшы дәмдеуіштер мен кешью жаңғағын алуды ұсынады.
"Міндетті түрде қалампыр, даршын, мускат жаңғағы мен кешью сатып алыңыз. Мұның бәрі Занзибарда өндіріледі, сапасы өте жақсы", - деді ол.
Сөзінің соңында саяхатшы Занзибарға балалармен барудың қажеті жоқ екенін атап өтті - мұнда балаларға арналған арнайы ойын-сауық орындары жоқтың қасы.
Дайындаған: Аружан Аманғалиева
