+7 (777) 001 44 99
Қазақстан жолдарында қай түсті автомокөліктер көп кездеседі? Жаңа статистика қазақстандықтардың қандай түске басымдық беретінін, ал қайсысы бүгінде сирек кездесетінін көрсетті, деп хабарлайды Tengri Auto.
Ақ түс көш бастап тұр, ашық түстер аз
Қазақстандықтар арасында әлі де бәсең әрі бейтарап түсті автомобильдер танымал болып отыр. Ақ түс нық сеніммен бірінші орында тұрса, сары, қызғылт сары, қызғылт және күлгін сияқты ашық түстер сату туралы хабарландыруларда айтарлықтай сирек кездеседі.
Мұндай қорытындыны Kolesa.kz сайтындағы 2026 жылдың маусымындағы хабарландыруларды, сондай-ақ кейінгі 12 айдағы статистиканы талдау арқылы жасауға болады.
Егер автокөлік түсі көрсетілмеген хабарландыруларды ескермесек (35,5 пайыз), ең танымал түс - ақ болып отыр: маусымда сатуға шығарылған барлық көліктің 18,1 пайызы осы түске тиесілі.
Одан кейінгі орындарда қара, күміс және сұр түстер тұр - осы түстер Қазақстанның қайталама нарығындағы ұсыныстардың негізгі бөлігін құрайды.
Осылайша, қазақстандық автокөлік иелерінің талғамы әлемдік үрдіске сай келеді: сатып алушылар практикалық жағынан тиімді және кейін қайта сатқанда өтімді болатын әмбебап түстерді көп таңдайды.
Келесі кезекте:
- қара — 12,2 пайыз;
- күміс — 10,5 пайыз;
- сұр — 7,3 пайыз;
- көк — 4,9 пайыз.
Ең танымал төрт бейтарап түс — ақ, қара, күміс және сұр, олар барлық хабарландырудың 48,1 пайызын құрайды. Яғни, нарықтағы әрбір екінші автомобиль дәл осы түсте сатылады.
Бұл ретте көк түс ашық түстер арасында ең танымалы болып отыр.
Жасыл түсті көліктер көк түстілерден екі есе аз
Көшбасшылардан кейінгі көрсеткіш әлдеқайда төмен. Жасыл түсті автомобильдер хабарландырулардың 2,9 пайызын, қызыл 1,5 пайызын, ал қою қызыл 1,2 пайызын иеленеді.
Одан да сирек кездесетіндер:
- қоңыр — 0,9 пайыз;
- алтын түстес — 0,9 пайыз;
- ашық көк — 0,7 пайыз;
- шие түстес — 0,7 пайыз;
- сарғыш — 0,6 пайыз.
Күлгін, көгілдір, сары, қола және қызғылт сары түсті көліктер нарықтың бір пайызына да жетпейді, ал қызғылт және ақшыл көк түстілер мүлдем кездеспейді десе де болады.
Бір жыл ішінде жағдай өзгерген жоқ
2025 жылғы 29 маусым мен 2026 жылғы 29 маусым аралығындағы статистика қазақстандықтардың талғамы тұрақты екенін көрсетеді.
Алғашқы бестікте бұрынғы түстер:
- ақ — 18,2 пайыз;
- қара — 12,0 пайыз;
- күміс — 11,1 пайыз;
- сұр — 7,4 пайыз;
- көк — 5,1 пайыз.
Төрт бейтарап реңкке барлық хабарландырудың 48,7 пайызы тиесілі, бұл маусымдағы статистикамен толықтай сәйкес келеді.
Жасыл түс 3,2 пайызды, қызыл 1,6 пайызды, қою қызыл 1,4 пайызды иеленеді. Қалған түстер де өз үлесін өзгертпеген.
Сатушылардың үштен бірі түсін көрсетпейді
Қызықты дерек, Қазақстандағы сатушылардың едәуір бөлігі хабарландыруда автомобильдің түсін мүлдем көрсетпейді.
Kolesa.kz мәліметтері бойынша, 2026 жылдың маусымында мұндай хабарландырулар 35,5 пайыз, кейінгі 12 айдың қорытындысы бойынша 34,2 пайыз болған. Басқаша айтқанда, шамамен әрбір үшінші көлік шанақ түсі көрсетілмей сатылымға шығарылған.
Егер мұндай хабарландыруларды жалпы тізімнен алып тастасақ, бейтарап түстер басымдығы одан да айқын көрінеді. Ақ түс сенімді түрде бірінші орынды иеленсе, одан кейін қара, күміс және сұр түстер орналасқан.
Жалпы алғанда, қазақстандық автокөлік иелерінің талғамы әлемдік трендпен сәйкес келеді: көпшілігі әлі де практикалық, назарды аз аударатын және әдетте қайталама нарықта оңай сатылатын әмбебап түстерді таңдайды. Ал сары, қызғылт сары, жасыл немесе қызғылт сияқты ашық түстер таңдаулылар үлесінде қалып, әлдеқайда сирек кездеседі.
Әлемдік тәжірибе
iSeeCars зерттеуіне сәйкес, 2025 жылы әлемдегі жаңа автомобильдердің шамамен 80 пайызы ақ, қара, сұр немесе күміс түстерге боялған. Ең танымал бес түстің ішіндегі жалғыз ашық реңк көк түс болды.
Жалпы ережеден спорттық автомобильдер ғана тыс қалып отыр. Зерттеу мәліметтеріне сүйенсек, спорткарлардың 36,2 пайызы ашық түсте сатылады. Бұл нарықтағы орташа көрсеткіштен екі есеге жуық жоғары.
Спорттық модельдер арасында мына түстер жиі кездеседі:
- сары;
- қызғылт сары;
- ашық көк;
- жасыл;
- күлгін.
Дегенмен, бұл санатта да сұр түс біртіндеп басымдыққа ие бола бастады — бүгінде ол спорткарлар арасында да ең танымал түске айналды.
Ал пикаптар мен басқа да утилитарлы автомобильдер, керісінше, көбінесе бейтарап түстерде шығарылады.
Сарапшылар мұны сатып алушылар мен дилерлер талғамымен байланыстырады: ақ, қара немесе сұр түсті көліктерді жаңа күйінде де, қайталама нарықта да сату оңайырақ, сондықтан бүгінде әлемнің көптеген елінде дәл осы түстер басым.
Түстер қайтадан сәнге айналып келеді
Бірақ қызықты үрдіс де жоқ емес: мамандар бірсарынды автомобильдер дәуірі біртіндеп аяқталып келе жатқанына сенімді. Әсіресе жасыл түстің түрлі реңкі, сондай-ақ қанық күлгін, қызғылт сары және күрделі інжу-маржан тәрізді жабындар танымалдылыққа ие болып жатыр.
Бұл үрдістің қозғаушы күштерінің бірі - электрмобильдер, олар үшін өндірушілер ерекше түстер мен бояудың жаңа технологияларын жиі ұсынады.
Осылайша, әзірге жолдарда ақ, қара, сұр және күміс түсті көліктер көп болғанымен, сарапшылар алдағы жылдары түс палитрасы қайтадан әртүрлі болуы мүмкін деп есептейді.
Бұған дейін қанша қазақстандық жүргізуші бір жылда бірде-бір рет айыппұл алмағанын жазған болатынбыз.
Тағы оқыңыз: Биыл Қазақстанда 10-15 миллион теңгеге қандай жаңа кроссовер сатып алуға болады: толық тізім.