Қостанай облысында жол талғамайтын көлік мопед жүргізушісін қағып өлтірді, - деп хабарлайды Алау порталы.
Оқиға 1 қазанда Алматы-Екатеринбург тасжолында Федоровский ауданының Пешковка ауылының маңында болған. Жол-көлік оқиғасы туралы мәліметті Қостанай облыстық ІІД-нің баспасөз қызметі растап отыр.
Теміртаудың 49 жастағы тұрғыны Land Cruiser Prado жол талғамайтын көлікті басқарып келе жатып, мопедті қағып кеткен.
"Жол-көлік оқиғасы салдарынан 28 жастағы мопедтің жүргізушісі оқиға орнында қаза тапты. Ол Қарабалық ауданы Тоғызақ ауылының тұрғыны болып шыққан", - деді ІІД-нің баспасөз қызметіндегілер.
Жол талғамайтын көліктің жүргізушісі сау болған. Тергеу жұмыстары жүргізіліп жатыр.
