+7 (777) 001 44 99
Қазақша
Русский
English
Қазақша
Русский
English
Қайтарылмаған қарыздың кесірінен Семей тұрғындары биыл жылусыз қалуы мүмкін, - деп хабарлайды Tengrinews.kz тілшісі.
Энергетика вице-министрі Бақытжан Жақсалиевтің айтуынша, тұрғындардың жылу мен электр энергиясына төлем төлемеуі салдарынан Семейде жылуға қатысты проблема туындауы мүмкін. "Семейде дебиторлық қарыз - 800 млн теңге. Сол себепті коммуналдық кәсіпорын электр энергиясы мен жеткізілетін көмір үшін борышқа батқан. Бұл мәселелердің қордалануы ақыр аяғында тұтынушының қыста жылусыз қалуына әкеліп соғады. Біздің азаматтар жылумен қамту қызметі үшін уақытылы төлем төлеу тәртібін сақтауды түсінуі тиіс", - деді ол Орталық коммуникациялар қызметінде өткен брифингте.
Орталық коммуникациялар қызметінің анықтамалық материалдарына қарағанда, тағы бірнеше аймақта мәселе бар. "Шығыс Қазақстан облысындағы Семей қаласы бойынша жылу желілерінің 80 пайызы тозған. Жөндеу жұмыстары кестеден кешігіп жатыр. Қостанай облысындағы "Арқалық жылу электр кешені" МҚК: негізгі жабдықтар әбден тозып тұр. Батыс Қазақстан облысы бойынша соңғы жылдары электр желі нысандарында мұз қату себепті болатын апаттар салдарынан электр берудің тоқтатылуы жиіледі. Алматы қаласындағы "Алматы жылу желілері" ЖШС-нде өткен жылғы жылыту маусымында күрделі технологиялық олқылықтар 33 пайызға (18 дерек) көбейді. Мерзімі 25 жылдан асқан жылу желілерінің көлемі - 65 пайыз", - делінген хабарламада.
Бірақ Жақсалиев алдағы жылыту маусымында жылудың уақытылы қосылатынын атап өтті. "Жылу желілерін уақытында іске қосу жөнінен ешқандай олқылық болмайды. Жылу тұтынушылары орташа тәуліктік температура үш-бес күн бойы 8 градустан төмен болғанда жылуға жалғанады. Жылу беру жөніндегі шешімді жергілікті атқарушы органдар, яғни қалалар мен облыстар әкімдіктері шешеді. Көптеген жергілікті атқарушы органдар, атап айтқанда, ауқымды жылу желілері бар ірі қалалардың әкімдіктері шешімді күні-бұрын қабылдай алады. Тұрғындар бұл жағынан қауіптенбеуі керек. Егер қандай да бір жерде ақаулар болып жатса, жергілікті атқарушы органдарға, Энергетикалық бақылау комитеті құрылымдарына хабарласу керек", - деді вице-министр.
Ол брифингте биыл 9 энергетикалық блокқа, 67 қазандық пен 47 турбинаға күрделі жөндеу жасау жоспарланғанын айтты. Бүгінде бес блок, 38 қазандық пен 18 турбина жөнделген.
