БЖЗҚ зейнетақы активтерінің валюталық үлесі сәуірде 40 пайыздан төмен болуына байланысты Қазақстан Ұлттық банкі биржалық сауда-саттықта 502 миллион доллар сатып алды. Бұл туралы Ұлттық банктің валюта нарығы туралы ақпараттық хабарламасында айтылған, деп хабарлайды Tengrinews.kz тілшісі.
Не болды?
Сәуір қорытындысы бойынша теңге бағамы 3,1 пайызға нығайып, бір доллар үшін 463,09 теңге болды. Айдың соңында доллар бағамы 2024 жылдың жазындағы ең төменгі деңгейге дейін түсті. Бұл БЖЗҚ зейнетақы активтеріндегі валюта үлесінің 40 пайыздық межеден төмендеуіне әкеп соқты. Теңгерімді қалпына келтіру үшін Ұлттық банк биржадан жарты миллиард доллардан астам сомаға шетел валютасын сатып алды.
"Зейнетақы жарналарының түсімі мен теңге бағамының нығаюына байланысты БЖЗҚ зейнетақы активтерінің валюталық үлесі 40 пайыздан төмен болды. Осыған байланысты Ұлттық банк сәуірде биржадағы сауда-саттық арқылы 502 млн АҚШ долларына шетел валютасын сатып алды. Бұл – жалпы сауда-саттық көлемінің шамамен 5,8 пайызы", - делінген хабарламада.
Ұлттық банк мәліметінше, алдағы шешімдер "зейнетақы активтерін инвестициялық басқару аясында нарықтық жағдайды ескере отырып" қабылданады.
Бұл не үшін қажет болды?
Ұлттық банк қазақстандықтардың зейнетақы ақшасын диверсификациялау үшін, яғни тек теңгеде емес, шетел валютасында да сақталуы үшін доллар сатып алды. Бұл тәуекелдерді азайтады: егер уақыт өте келе теңге әлсіресе, валюталық активтер жинақтардың нақты құнын сақтауға және болашақ зейнетақыны бағамның күрт құбылуы мен инфляциядан қорғауға көмектеседі. Әртүрлі валюта әлемдік экономикалық оқиғаларға әрқалай әсер етеді, сондықтан қаражатты олардың арасында бөлу зейнетақы портфелін неғұрлым тұрақты етеді.
Ұлттық банк сәуірде тағы қандай операциялар жүргізді?
Ұлттық банктің мәліметінше, сәуірде Ұлттық қордан валюта сату көлемі 300 миллион долларды құрады, бұл республикалық бюджетке трансферттер бөлуді қамтамасыз етуге мүмкіндік берді. Мамырда бұл сома Үкіметтің алдын ала болжамды өтінімдеріне сәйкес 400-ден 500 миллион долларға дейін жетуі мүмкін.
Сонымен қатар сәуірде Ұлттық банк бағам мен инфляцияға түсетін қысымды азайту үшін экономикадан "айналау" операциялары аясында шамамен 354 миллиард теңге алды. Бұл - артық өтімділік нарықтан уақытша шығарылған кезде жасалатын шара. Мамырда осы мақсатта дәл сондай сомаға валюта сату жоспарланып отыр. Ұлттық банк валютаны сатқан кезде, ол теңгені қайтарып алады, осылайша айналымдағы ақша көлемін қайтадан азайтады.
Таратылған хабарламаға сәйкес, Ұлттық банк сәуірде валюталық интервенция жүргізген жоқ.
Ай қорытындысы бойынша валюталық түсімді сату көлемі шамамен 273 миллион долларды құрады.
Мән-жайы
Бұған дейін қазақстандықтар БЖЗҚ-дағы шоттарынан ақша жоғалып жатқанын байқай бастағаны туралы жазған болатынбыз. Жетіспейтін сома 50 мыңнан 150 мың теңгеге дейін болып шыққан. Ұлттық банк инвестициялық табыстағы теріс көрсеткіш бұл жолы доллар бағамының төмендеуіне байланысты пайда болғанын хабарлады. Өйткені активтердің тең жартысына жуығы осы валютаға аударылға. Толығырақ мына жерден оқыңыз.
Тағы оқыңыз: Қазақстан теңгенің нығаюына байланысты 146 миллиард жоғалтты
