+7 (777) 001 44 99
ПОДЕЛИТЬСЯ
Алматыда Қазақстанның халық әртісі, композитор Шәмші Қалдаяқовтың ескерткіші ашылды, - деп хабарлайды Tengrinews.kz тілшісі.
Алматыда Қазақстанның халық әртісі, композитор Шәмші Қалдаяқовтың ескерткіші ашылды, - деп хабарлайды Tengrinews.kz тілшісі.
"Қазақ вальсі королінің" ескерткіші Республика сарайының қасындағы саябақтың солтүстік жағына қойылды. Салтанатты ашылу рәсіміне қала әкімі Бақытжан Сағынтаев, композитордың жары Жәмилә Қалдаяқова, әнші Нұрғали Нүсіпжанов пен Роза Рымбаева, ақын Мұхтар Шаханов қатысып, сазгер жайлы естеліктерін бөлісті.
"Ағамыз әндерімен жүрегімізде әрдайым қала береді. Шәмші ағаның өзі де, әні де ешқашан көнермейді. Осы саябақтың ішінде жақсы ескерткіш ашылғалы тұр. Еліміздің ең үлкен сахнасы - Республика сарайында. Міне, тура соның жанынан ескерткіш қойдық", - деді Сағынтаев.
Ескерткішті салтанатты түрде Бақытжан Сағынтаев пен композитордың жары Жәмилә Қалдаяқова ашты. Ескерткіштің биіктігі - 1,5 метр, ұзындығы - 2,8 метр. Оны бес мүсінші жасаған.
Мүсіншілердің бірі Қанат Бегулиевтің айтуынша, ескерткіштің материалы қоладан жасалған. Тұғырға гранит тас қойылды.
"Композициясына келер болсақ, бұл - Қалдаяқовтың орындықта шығармашылық ой үстінде отырған сәті. Адамдар саябақта көп жүреді, сондықтан ескерткішті төмен тұрғырға қойдық. Халықтың суретке түсуіне, жақынырақ көруіне ыңғайлы болсын дедік. Ескерткішті жасау барысында Шәмші ағаның көзін көрген адамдардан мәлімет жинадық, деректі фильмдер көрдік. Шәмші Қалдаяқовтың ұлы бізге ақыл-кеңесін айтты, біз білмейтін көптеген қырын ашты", - деді Қанат Бегулиев.
Шәмші Сағынтаев пен Жәмила Қалдаяқова
Шәмші Қалдаяқов - композитор, Қазақстанның халық әртісі, Қазақстан мәдениетіне еңбегі сіңген қайраткер. Лирикалық әндері үшін халық оны "Қазақ вальсінің королі" атап кеткен. Ол осы заманғы қазақ эстрадасының негізін салушылардың бірі саналады.
Суреттер: Әлихан Сариев
