Жамбыл облысында полицейлер оқушының өліміне қатысы бар деп күдікке ілінген жасөспірімдерді ұстады, - деп хабарлайды Tengrinews.kz тілшісі өңірлік ПД баспасөз қызметіне сілтеме жасап.
12 қыркүйекте Шу ауданына қарасты Көккайнар ауылында футбол ойыны аяқталған соң 10 және 11-сынып оқушылары арасында жанжал шыққан. Жиналған балалар футбол ойнап жатқан, кіші сынып оқушылары үлкендерді жеңіп кеткен. Нәтижеге көңілі толмаған 11-сынып оқушысы 10-сыныптағы жасөспірімді ұрып тастаған.
Оқиға орнына келген дәрігерлер жәбірленушінің алған жарақатынан көз жұмғанын анықтады. Жасөспірімдермен профилактикалық әңгіме жүргізілді. Баланың өліміне байланысты Балалар құқықтары жөніндегі уәкілдің қатысуымен арнайы комиссия құрылды.
"Жедел-іздестіру іс-шаралары барысында полиция қызметкерлері 17 және 16 жастағы екі күдіктіні анықтап, уақытша ұстау изоляторына қамады. Қазір істі толық әрі жан-жақты тергеу үшін барлық қажетті тергеу амалдары жүргізіліп жатыр. ҚР ҚПК-нің 201-бабына сәйкес, өзге деректер тергеу мүддесіне байланысты жария етілмейді", – делінген Жамбыл облысы ПД баспасөз қызметінің хабарламасында.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
