+7 (777) 001 44 99
Оралдық 23 жастағы Ясмина Хуспанова Португалия жағалауындағы Camino de Santiago бағытын жүріп өтті. Ол 11 күн ішінде 260 шақырымды жаяу еңсеріп, әлемнің түкпір-түкпірінен келген жүздеген адамды жолықтырды. Саяхат барысында ол жолсеріктеріне Қазақстан туралы айтып беріп, оларға әйгілі отандық шоколадты сыйға тартқан, деп хабарлайды Tengri Travel.
Бәрі қалай басталды?
Саяхаттау Ясминаның өмір салтына айналғалы қашан. Мектеп бітірген соң ол Түркияның Измир және Ыстамбұл қалаларында екі жыл тұрды. Өткен жылы Вьетнамда алты ай болып, Нячанг, Далат және Дананг қалаларында тұрып үлгерді.
Қазір бойжеткен қашықтықтан лингвистика саласын оқып, шетел тілдерінен онлайн сабақ береді. Бұған дейін ол киім дизайнымен де айналысқан.
"Маған түрлі елдердің мәдениетін зерттеген қатты ұнайды, әлемді шарлау әрқашан менің арманым болатын. Табыс таба бастағаннан-ақ бірден саяхатқа ақша жинай бастадым", - дейді Ясмина.
Жақында оның жетістіктер тізімі тағы бір байырғы мақсат - Сантьяго жолымен толықты.
Camino de Santiago дегеніміз не?
Camino de Santiago әлемдегі ең көне қажылық бағыттардың бірі саналады. Оның барлық тармақтары Испанияның Галисия аймағындағы Сантьяго-де-Компостела қаласына апарады.
Бастапқыда бұл жол христиандық қажылықпен байланысты болса, бүгінде оны әртүрлі көзқарастағы және діни сенімдегі адамдар жүріп өтеді. Көптеген адам үшін бұл өз мүмкіндігін сынап көруге, жайлылық аймағынан шығуға және өмірлік тәжірибесін саралауға мүмкіндік береді.
"Мен сияқты және жолда танысқан достарым секілді көптеген жан бұған ішкі даму үшін, өздерінің іс жүзінде не нәрсеге қабілетті екенін білу үшін барады", - деді Ясмина.
Ол өз саяхаты үшін Португалияның жағалау бағытын таңдады. Порту қаласынан жолға шыққан бойжеткенді Атлант мұхитының жағалауымен 260 шақырымдық жаяу жол күтіп тұрды.
Күн сайын 20-дан 30 шақырымға дейін жаяу жүруге тура келді. Бойжеткен жол бойында орналасқан қажыларға арналған арнайы баспана - альбергелерде түнеп отырды.
Саяхат қалай өтті?
Осындай баспаналардың бірінде Ясмина саяхатшылар өздері келген қалаларды түйреуішпен белгілеп қоятын әлем картасына назар аударған.
"Мәселен, Еуропа мен Орталық Азиядан келген белгілердің санындағы үлкен айырмашылықты байқауға болады, сондықтан бұл жолда өз елімнің ізін қалдыра алғаныма өте мақтанамын. Мен осы бағытты өткен Қазақстаннан келген сегізінші адам болдым", - деді ол.
11 күндік жол бойы Ясмина үстінен "Kazakhstan" деген жазуы бар желбегейін тастамаған. Оның айтуынша, бұл саналы түрде қабылданған шешім.
"Мен бұл қиын жолды тек өзім үшін ғана емес, бүкіл елім үшін жүріп келе жатқандай сезіндім", - деп атап өтті саяхатшы.
Instagram-дағы бұл жарияланымды көру
Ясмина Қазақстан туралы тек сөзбен ғана айтып қоймай, іспен де көрсетуді жөн көрген. Ол рюкзагына қазақстандық шоколадтарды салып алып, жол-жөнекей кездескен адамдарға таратқан.
"Көптеген адам Қазақстан туралы ешқашан естімегенін, бірақ менің әңгімелерімнен кейін елімізді келіп көргісі келетінін айтты", - деп бөлісті Ясмина.
Сапар барысында ол Еуропа, Азия, Солтүстік және Оңтүстік Америка, сондай-ақ Австралиядан келген адамдармен танысқан.
"Әркім өз тарихын, түйген ойларын және тәжірибесін бөлісті. Мен үшін бұл ұмытылмас шытырман оқиға болды - Атлант мұхиты жағалауы мен Португалия мен Испанияның табиғатының өзі неге тұрады", - деді ол.
Әрі қарай не болды?
Бойжеткеннің саяхаты мұнымен аяқталмайды. Ол 26 маусымда Парижге қазақстандық сән көрсетіліміне аттанады.
Бұл іс-шараға Кристиан Диордың басты музасы саналған және қазақ тамыры бар екені анықталған Алла Ильчунның тарихына деген жаңа қызығушылық себеп болған.
Көрсетілімде Ясмина подиумға модель ретінде шығады.
Бойжеткен бір Camino-мен ғана шектеліп қалмақ емес. Келесі жылы ол Сантьяго жолының француз бағытын жүріп өтуді жоспарлап отыр, бұл бағыт ол өткен португал жолынан шамамен екі есе ұзын.
"Меніңше, саяхатқа деген құштарлық менің қанымда бар. Көшпенді бабаларым маған басқа таңдау қалдырмаған сияқты", - деп күледі Ясмина.
Сондай-ақ бойжеткен жоспарда жаңа елдер және Сербияға көшу бар екенін атап өтті.
