Украина президенті Владимир Зеленский Америка көшбасшысы Дональд Трамптың өз еліндегі бейбітшілік кепілі бола алмайтынын мәлімдеп, оның себебін түсіндірді. Бұл туралы ол ICTV телеарнасына берген сұхбатында айтты, деп хабарлайды Tengrinews.kz тілшісі РБК-Украина басылымына сілтеме жасап.
Зеленский Ресей АҚШ президенті Дональд Трамптан қорыққандықтан жаңа шабуылдан бас тартады деген болжам қауіпсіздіктің жеткілікті кепілі емес деп санайды.
Оның айтуынша, қақтығыс сызығында халықаралық серіктестердің болмауы Ресейді тежеу мәселесін ашық қалдырады.
"Украинаға қауіпсіздіктің қандай кепілдіктері беріліп жатыр? Егер біздің серіктестеріміз қақтығыс сызығында болмаса, онда неге ресейліктер біраз уақыттан кейін қайтадан шабуыл жасамайды? Міне, неліктен? Мен мұны мүлдем түсінбеймін. Себебін көріп тұрған жоқпын. Оларды не шектейді? Не?", - деді Зеленский.
Ол сондай-ақ АҚШ-тың Ресей Трамптың қатал реакциясынан қорқып, эскалацияға бармайды деген ұстанымына қатысты пікір білдірді.
"Мәселен, АҚШ президент Трамп туралы айтады. Трамп тағы екі жарым жыл президент болады, ал одан кейін не істейміз?", - деді Зеленский.
АҚШ бұған дейін Украинаға нақты қауіпсіздік кепілдіктерін тек соғыс қимылдары аяқталғаннан кейін ғана беруге дайын екенін мәлімдеген. Сонымен қатар бұл мәселені Украина әскерлерін Донецк және Луганск облыстарының кейбір бөліктерінен шығару шарттарын орындаумен байланыстырған.
"Олар біздің Луганск және Донецк облыстарынан шыққанымызды қалайды. Әрине, стратегиялық тұрғыдан бұл біз үшін - жеңіліс, Қарулы Күштер үшін - жеңіліс. Фортификациялық құрылыстар, қорғаныс шебі, біздің әлсірейтініміз анық", - деді Зеленский.
Басылым ақпаратынша, осы тұрғыда Украина қауіпсіздік кепілдіктері туралы жаңартылған құжат дайындап жатыр, ол Ресейдің қайталанған агрессиясынан қорғауды қамтамасыз етіп, серіктестердің әрекет етуінің нақты тетіктерін айқындауы тиіс.
