1. Басты
  2. Біл
  3. Жаңалықтар
  4. Ел жаңалықтары

Тоқаев: Мақтааралда күзге дейін қираған үйлердің орнына жаңасы салынады

Президент Қасым-Жомарт Тоқаев Өзбекстандағы Сардоба су қоймасы бөгетінің бұзылуы салдарынан Түркістан облысындағы жағдайға байланысты сөз сөйледі, - деп хабарлайды Tengrinews.kz тілшісі.

Мемлекет басшысы Түркістан облысындағы су тасқыны техногенді сипаттағы төтенше жағдай екенін айтты. 

"Мақтаарал ауданына қарасты 5 ауылдың 1 мыңнан астам тұрғын үйін су басып қалды. Сондай-ақ 9 елді мекенді су басу қаупі туындады. Шұғыл қабылданған шаралардың арқасында су тасқынының әрі қарай таралуына жол бермедік. Қазір су тасқынының зардаптарын жою, тазалау жұмыстары жүргізілуде", - деді Тоқаев.

Президент зардап шеккен ауылдардың әрбір азаматы қамқорлықсыз қалмайтыны айтты.

"Қоғамдық тәртіп пен тұрғындардың дүние-мүлкінің сақталуын қамтамасыз ету басты назарда. Біз ауданның күнделікті тіршілігін қайта қалпына келтіру үшін қажетті шаралар қабылдаймыз. Жалпы күзге дейін қираған үйлердің орнына жаңа тұрғын үйлер салынады. Зардап шеккен әрбір адамға 100 мың теңге көлемінде өтемақы төленеді.  Мал шығыны, тасқынның ауыл шаруашылығы алқаптарына тигізген зияны өтеледі. Жалпы, зардап шеккен ауылдардың әрбір азаматы қамқорлықсыз қалмайды. Оларға жәрдем береміз", - деді Мемлекет басшысы.

Ол зардап шеккен ауданға көмектесіп жатқан азаматтардың бәріне ризашылығын білдірді. Тоқаев мұндай азаматтарды халқымыздың шынайы патриоттары, тілеулестері деуге болатынын айтты.

"Тасқын болған жерде әкімдік, сондай-ақ, Қорғаныс министрлігі,  Ұлттық ұлан мен Төтенше жағдай жөніндегі комитет бөлімшелері және полиция қызметкерлері жұмыс істеуде. Отандық және шетелдік ірі бизнес өкілдері де зардап шеккен тұрғындарға айтарлықтай көмек бергенін ерекше атап өткен жөн. Баршаңызға алғыс айтамын!", - деді Тоқаев. 

Қазақстан жаңалықтары. Соңғы жаңалықтар. Telegram желісінде бізге жазыл!