Қазақстанда АИ-92 маркалы бензиннің бағасы 99 теңгеге дейін төмендеді, - деп хабарлайды Tengrinews.kz тілшісі ҚР Энергетика министрлігіне сілтеме жасап.
"Қазақстан Республикасының 2011 жылдың 20 шілдесінде шыққан "Мұнай өнiмдерiнiң жекелеген түрлерiн өндiрудi және олардың айналымын мемлекеттiк реттеу туралы" Заңының 7-бабы 15-тармағына және 9-баптың 2-бөлігінің 3-тармағына сәйкес, мемлекеттік реттеу бағамы бекітілген мұнай өнімдеріне қосылған құн салығымен қоса есептегенде мынадай шекті бағаны белгілеуді бұйырамын: дизель отынының әр литрі - 99 теңге, АИ-80 әр литрі - 89 теңге, АИ-92/93 әр литрі - 99 теңге", - делінген Энергетика министрі Владимир Школьниктің бұйрығында.
Бұйрықтың орындалуын қадағалау міндетті Қазақстанның Энергетика вице-министрі Ұзақбай Қарабалинге жүктелді. "Бұйрық мемлекеттік тіркеуден өткен күннен бастап күшіне енеді және ресми түрде жариялануы тиіс", - делінген құжатта.
Айта кетейік, бензин бағасы осымен үшінші рет ресми түрде төмендеді. Бірінші рет бензин бағасы өткен жылы 10 желтоқсанда төмендеді. Ол кезде дизель отынының әр литрі 107 теңге, АИ-80 әр литрі 89 теңге, АИ-92/93 әр литрі 115 теңге болды. Одан кейін жанар-жағармай тағы арзандап, АИ-92 маркалы бензиннің әр литрі 109 теңгеден сатылды. Ақпан айының басында жанар-жағармай құю бекеттерінің көпшілігінде бензин бағасы төмендеді, Аи-92 бензині 107 теңгеден, ал кейбіреулерінде 105 теңгеден сатыла бастады.