+7 (777) 001 44 99
Қазақша
Русский
English
Қазақша
Русский
English
Наурызда Қазақстанда жыл басынан бергі құрылыс саласындағы бағаның ең айқын өсімі тіркелді. Ұлттық статистика бюросының мәліметіне сәйкес, құрылыс материалдары бағасының индексі ақпанмен салыстырғанда 100,5 пайыз, ал 2024 жылғы наурызбен салыстырғанда – 102,2 пайыз болған. Салыстыру үшін айта кетсек, қаңтар және ақпанда бұл көрсеткіштер төменірек болған – тиісінше 99,9 және 100,1 пайыз, - деп хабарлайды Tengrinews.kz TENGENOMIKA Telegram-арнасына сілтеме жасап.
Айтарлықтай өсім негізгі құрылыс материалдарына әсер етті
Бағаның едәуір өсімі ғимараттар мен құрылыстар салуда қажетті негізгі материалдарға байланысты:
- Тас, әктас, бор, тақтатас және гипс – бір айда 13,2 пайызға, бір жылда 52,5 пайызға өсті;
- Пластикалық плиталар, құбырлар мен профильдер – айына +11,9 пайыз, жылына +13,1 пайыз;
- Тауарлық бетон – айына +4,1 пайыз, жылына +7,5 пайыз.
Бұл материалдар іргетас, қасбеттер, арақабырғалар мен инженерлік жүйелерде қолданылады. Олардың қымбаттауы құрылыс процесінің жалпы құнының өсуіне алып келеді.
Импортқа тәуелділік
Қазақстан құрылыс материалдарының басым бөлігін өзі өндірсе де, олардың айтарлықтай үлесі импортталады, әсіресе Ресейден. Сарапшылардың мәліметінше, Ресейдің құрылыс материалдары импорты нарығындағы үлесі шамамен 50 пайыз болады.
Теңгенің әлсіреуі
2025 жылдың басынан бері теңге рубльге қатысты 20 пайыздан астам әлсіреді. Бұл ресейлік материалдардың теңгедегі бағасының өсуіне алып келді, тіпті рубль бағасы өзгермесе де. Нәтижесінде құрылыс жобаларының өзіндік құны артты.
Тұрғын үй бағасының өсуі уақыт еншісінде
Сарапшылардың айтуынша, құрылыс материалдарының қымбаттауы жылжымайтын мүлік нарығына әсер етуі мүмкін. Көктемде сұраныстың жандануы аясында құрылыс компаниялары шығындардың өсуін тұрғын үй бағасына қосуы ықтимал.
"Бағаның өсуі – отандық өндірушілерге қолдауды күшейту, логистиканы дамыту және импортқа бағытталған жеткізілімдерді қайта қарау қажеттігін білдіретін белгі. Сала сыртқы нарықтарға тәуелді болған жағдайда, ол валюта ауытқулары мен сыртқы экономикалық қауіптерге осал болып қала береді", – дейді арна авторлары.
Еске салайық, 1 сәуірде Ұлттық статистика бюросы Қазақстандағы инфляция жөніндегі деректерді жариялады. Бюроның мәліметінше, наурызда тұтыну бағаларының айлық индексі 1,3 пайыз болған (ақпанда ол 1,5 пайыз болған). Бір айда азық-түлік тауарларының бағасы 1,6 пайызға, ақылы қызметтер – 1,3 пайызға, азық-түлікке жатпайтын тауарлар – 0,8 пайызға өсті.
